اسلام آباد(نیوز ڈیسک) چیئرمین پاکستان تحریک انصاف (پی ٹی آئی) عمران خان کیخلاف خاتون جج دھمکی کیس میں نظرثانی اپیل پر سماعت 3 مئی تک ملتوی کر دی گئی ۔آج ڈسٹرکٹ اینڈ سیشنز کورٹ میں چیئرمین پی ٹی آئی عمران خان کیخلاف خاتون جج دھمکی کیس کی سماعت ہوئی،عمران خان کی جانب سے نظرثانی اپیل دائر کی گئی، عدالت میں عمران خان کے وکیل گوہرعلی پیش ہوئے۔تھانہ مارگلہ کے تفتیشی افسر صغیرعلی ریکارڈ سمیت عدالت پیش ہوئے، عمران خان کے وکیل گوہر علی خان کی جانب سے سماعت ملتوی کرنے کی استدعا کی گئی،کیس میں نعیم پنجوتھہ نے پیش ہونا ہے جو اس وقت لاہور ہیں، گوہر علی نے استدعا کی کہ عمران خان کے وکیل آج دستیاب نہیں، سماعت ملتوی کی جائے جج نے دلائل سننے کے بعد کیس کی سماعت 3 مئی تک ملتوی کر دی۔
