گوالیار (اے بی این نیوز) بھارتی ریاست مدھیہ پردیش کے شہر گوالیار میں ایک حیران کن واقعہ سامنے آیا ہے، جہاں چڑیا گھر کی سیر کے لیے آنے والی نئی نویلی دلہن مبینہ طور پر اپنے شوہر کو داخلی دروازے پر چھوڑ کر ایک دوسرے شخص کے ساتھ موٹر سائیکل پر روانہ ہوگئی۔
بھارتی میڈیا رپورٹس کے مطابق 21 سالہ نوجوان اپنی 18 سالہ اہلیہ کے ہمراہ چڑیا گھر پہنچا تھا۔ شوہر نے اپنی بیوی کو داخلی دروازے پر رکنے کا کہا اور خود موٹر سائیکل پارک کرنے کے لیے چلا گیا۔
رپورٹس کے مطابق جب شوہر چند منٹ بعد واپس آیا تو اس کی اہلیہ وہاں موجود نہیں تھی۔ بتایا جاتا ہے کہ خاتون مبینہ طور پر ایک دوسرے شخص کے ساتھ موٹر سائیکل پر بیٹھ کر روانہ ہوگئی۔ واقعے کی سی سی ٹی وی فوٹیج سامنے آنے کی اطلاعات بھی ہیں۔
واقعے کے بعد شوہر نے پولیس سے رابطہ کیا اور ارمان خان نامی شخص پر الزام عائد کیا کہ وہ اس کی اہلیہ کو بہلا پھسلا کر اپنے ساتھ لے گیا ہے۔ تاہم یہ الزام تاحال شوہر کی جانب سے عائد کیا گیا ہے، جس کی آزادانہ تصدیق سامنے نہیں آئی۔
پولیس کے مطابق خاتون کی تلاش جاری ہے۔ حکام کا کہنا ہے کہ خاتون کی بازیابی اور اس کا بیان سامنے آنے کے بعد ہی صورت حال واضح ہوسکے گی کہ وہ اپنی مرضی سے گئی تھی یا اسے کسی قسم کے دباؤ یا ترغیب کا سامنا تھا۔
واقعے کے حوالے سے مزید تفصیلات اور پولیس کی تحقیقات کے نتائج سامنے آنے کا انتظار ہے۔
مزیدپڑھیں: ستاروں کی روشنی میں آپ کا آج جمعہ کا دن کیسا رہے گا؟
