کراچی(نیوزڈیسک)لانڈھی میں پولیس مقابلے میں ایک مبینہ ڈاکو ہلاک جبکہ دوسرے کو زخمی حالت میں گرفتار کرلیا گیا۔لانڈھی پولیس کے مطابق ملزمان لانڈھی نمبر 4 کے قریب صبح سویرے شہریوں سے لوٹ مار کررہے تھے کہ پولیس موقع پر پہنچ گئی۔ پولیس کو دیکھتے ہی ملزمان نے اندھا دھند فائرنگ شروع کردی اور فرار ہونے لگے۔دو طرفہ فائرنگ کے تبادلے کے بعد پولیس نے ایک ڈاکو کو ہلاک جبکہ دوسرے کو زخمی حالت میں گرفتار کرلیا، ملزمان کے قبضے سے اسلحہ، 9 موبائل فونز، 3 پرس، 2 اسکول بیگ، نقدی اور مسروقہ موٹر سائیکل برآمد کرلی گئی، ہلاک ڈکیت کی شناخت سومار ولد الیاس اور زخمی ملزم کی راشد ولد رمضان کے نام سے کی گئی جنہیں جناح اسپتال منتقل کردیا گیا ہے۔ایس ایچ او لانڈھی فرخ ہاشمی کے مطابق مقابلے میں ہلاک اور زخمی حالت میں گرفتار ڈکیت صبح سویرے اپنے بچوں کو اسکول چھوڑنے جانے والے والدین سے لوٹ مار میں ملوث تھے، ملزمان اسکول جانے والے بچوں کے اسکول بیگ بھی چھین کر فرار ہو جاتے تھے۔ایس ایچ او نے بتایا کہ ملزمان نے صبح سویرے انٹریو پر جانے والے نوجوان سے بھی لوٹ مار کی تھی اور اس کا بیگ بھی چھین کرفرار ہوئے جبکہ خواتین سے پرس چھیننے کے واقعات بھی ملوث ہیں۔پولیس کے مطابق ہلاک اورزخمی حالت میں گرفتار ڈکیتوں کا سابقہ کرمنل ریکارڈ چیک کیا جا رہا ہے جبکہ قانونی کارروائی کا آغاز کردیا گیا ہے۔
