لاہور،کراچی (اے بی این نیوز )ملک بھر میں مون سون سے پہلے ہونے والی بارشوں نے جہاں گرمی کی شدت کم کر دی ہے وہیں کئی شہروں میں شہری زندگی شدید متاثر ہونے لگی ہے۔ کراچی میں ایک بار پھر تیز ہواؤں کے ساتھ موسلا دھار بارش کا سلسلہ شروع ہوا جس نے مختلف علاقوں کو اپنی لپیٹ میں لے لیا۔ آئی آئی چندریگر روڈ، صدر، شاہراہ فیصل، کورنگی انڈسٹریل ایریا، شادمان ٹاؤن، گلشن معمار، احسن آباد، اورنگی ٹاؤن، نارتھ ناظم آباد اور اولڈ سٹی ایریا سمیت متعدد علاقوں میں وقفے وقفے سے تیز بارش ریکارڈ کی گئی۔
بارش کے باعث کئی سڑکیں زیرِ آب آ گئیں جبکہ مختلف علاقوں میں بجلی کی فراہمی معطل ہونے سے شہریوں کو شدید مشکلات کا سامنا کرنا پڑ رہا ہے۔ تیز ہواؤں کے باعث بعض مقامات پر درخت اور سائن بورڈ گرنے کی اطلاعات بھی موصول ہو رہی ہیں۔ شہریوں نے سوشل میڈیا پر بارش کی ویڈیوز اور تصاویر شیئر کرتے ہوئے خوشی اور پریشانی دونوں کا اظہار کیا، کہیں موسم خوشگوار ہونے پر سکون کا اظہار کیا گیا تو کہیں پانی جمع ہونے اور ٹریفک جام پر شکایات سامنے آئیں۔
انتظامیہ کی جانب سے شہریوں کو ہدایت کی گئی ہے کہ غیر ضروری طور پر گھروں سے باہر نہ نکلیں اور ہنگامی صورتحال میں فوری مدد کے لیے ریسکیو ہیلپ لائن پر رابطہ کریں۔ کمشنر کی ہدایت پر تمام ضلعی افسران کو الرٹ کر دیا گیا ہے تاکہ کسی بھی ناخوشگوار صورتحال سے بروقت نمٹا جا سکے۔
دوسری جانب محکمہ موسمیات نے ملک کے مختلف علاقوں میں ممکنہ سیلابی صورتحال سے خبردار کر دیا ہے۔ پشاور اور نوشہرہ کے مقامات پر دریائے کابل میں اونچے درجے کے سیلاب کا خدشہ ظاہر کیا گیا ہے جبکہ بلوچستان کے وسطی اور شمالی ندی نالوں میں بھی طغیانی کا امکان ہے۔
اسی طرح لاہور میں فلڈ فارکاسٹنگ حکام نے چار اپریل تک ممکنہ سیلابی صورتحال کی وارننگ جاری کر دی ہے جبکہ اسلام آباد، ڈیرہ غازی خان اور راجن پور کے مختلف ندی نالوں میں بھی پانی کے بہاؤ میں اضافے کا خدشہ ظاہر کیا جا رہا ہے۔ گلگت بلتستان اور آزاد کشمیر کے پہاڑی علاقوں میں بھی بارشوں کے باعث سیلابی ریلوں کا خطرہ موجود ہے۔
ادھر صحبت پور اور مانجھی پور کے علاقوں میں موسلا دھار بارش کے بعد نشیبی علاقے زیرِ آب آ گئے ہیں، سڑکوں پر پانی جمع ہونے سے آمد و رفت متاثر ہوئی جبکہ کئی علاقوں میں بجلی کی فراہمی بھی معطل ہو گئی۔ گرج چمک کے ساتھ ہونے والی بارش نے گرمی کا زور توڑ دیا اور موسم خوشگوار ہو گیا، تاہم شہریوں کو احتیاط برتنے کی ہدایات جاری کی گئی ہیں۔
ماہرین کا کہنا ہے کہ موسمیاتی تبدیلیوں کے باعث بارشوں کے پیٹرن میں شدت آ رہی ہے، جس کے باعث شہری علاقوں میں نکاسی آب کے نظام کی بہتری ناگزیر ہو چکی ہے۔ عوام کو ہدایت کی گئی ہے کہ وہ نشیبی علاقوں سے دور رہیں، بجلی کے کھمبوں اور کھلے تاروں سے فاصلہ رکھیں اور کسی بھی ہنگامی صورتحال میں فوری طور پر متعلقہ اداروں سے رابطہ کریں۔
کراچی بارش, پاکستان موسم, موسلا دھار بارش, سیلاب الرٹ, محکمہ موسمیات, شہری مسائل, بجلی بندش, بارش اپڈیٹس, پاکستان نیوز, موسم کی صورتحال
مزید پڑھیں :
