اسلام آباد ( اے بی این نیوز )وفاقی آئینی عدالت نے سرکاری ملازمین کی وفات کے بعد ان کے بچوں کو ملازمت دینے کے کوٹہ سے متعلق سندھ ہائیکورٹ کے فیصلے پر حکمِ امتناع جاری کر دیا ہے۔جسٹس عامر فاروق کی سربراہی میں تین رکنی بینچ نے سندھ حکومت کی اپیل پر ابتدائی سماعت کے دوران تمام فریقین کو نوٹس جاری کیے اور سندھ ہائیکورٹ کے فیصلے کو معطل کر دیا۔سماعت کے دوران جسٹس عامر فاروق نے کہا کہ سپریم کورٹ کا سال 2024 کا فیصلہ ماضی کے لیے نافذ نہیں ہوا بلکہ اس کا اطلاق مخصوص قانونی دائرہ کار میں ہے۔
سندھ حکومت کے وکیل نے عدالت کو بتایا کہ سندھ ہائیکورٹ نے یہ فیصلہ کیا تھا کہ سپریم کورٹ کے فیصلے کا اطلاق نہ تو مستقبل کے معاملات پر ہوگا اور نہ ہی زیر التوا معاملات پر، لیکن یہ تشریح درست نہیں۔ انہوں نے مزید کہا کہ سپریم کورٹ کے فیصلے نے ماضی کے فیصلوں اور پہلے سے طے شدہ معاملات کو قانونی تحفظ فراہم کیا ہے، جبکہ سندھ ہائیکورٹ نے اس کی صحیح تشریح نہیں کی۔عدالت نے دلائل سننے کے بعد سندھ ہائیکورٹ کے فیصلے کو معطل کر دیا اور کیس کی مزید سماعت کے لیے نئی تاریخ مقرر کرنے کا عندیہ دیا۔
مزید پڑھیں :ملک کے بڑے تعلیمی نیٹ ورک کے سربراہ غائب،اغوا،جانئے تفصیلات
