اسلام آباد(نیوز ڈیسک) دورہ میں پاکستان سے تعمیری بات چیت ہوئی ، عالمی مالیاتی ادارے (آئی ایم ایف) نے پاکستان کے دورے کے بعد اعلامیہ جاری کر دیا۔تفصیلات کے مطابق آئی ایم ایف کی جانب سے جاری اعلامیے میں کہا گیا ہے کہ آئی ایم ایف ٹیم نے 31 جنوری تا 9 فروری پاکستان کا دورہ کیا جو پروگرام کے نویں جائزے کے لیے تھا جب کہ دورے میں پاکستان سے تعمیری بات چیت ہوئی،مذاکرات میں مقامی اور بیرونی ناہمواریاں دور کرنے کے لیے قابل ذکر بات چیت کی گئی ، دورے میں مستقل ریونیو حصول کے اقدامات، نان ٹارگٹڈ سبسڈی میں کمی، غریب ترین طبقے کے سماجی تحفظ بڑھانے اور سیلاب متاثرین کی مدد کرنے پر بھی بات ہوئی،مذاکرات میں گردشی قرض میں کمی کرکے توانائی کے شعبے میں عملداری یقینی بنانے اور پاکستانی حکام سے توانائی کی فراہمی بہترکرنے پربات ہوئی۔ انہوں نے مزید کہا ہے کہ پاکستان کے لیے میکرو استحکام، پائیدار ترقی کے لیے سرکاری شراکت داروں سے مالی مدد ضروری ہے۔ ناتھن پورٹر نے یہ کہا کہ فیصلہ کن پالیسوں پر بر وقت عمل درآمد سے پاکستان میں میکرو استحکام آئے گا، ان پالیسیوں پر عمل درآمد کے لیے ورچوئل مذاکرات جاری رہیں گے۔