دبئی (اے بی این نیوز)قومی ٹیم کے سابق فاسٹ بولر محمد عامر کو ابوظہبی ٹی 10 لیگ 2025 میں نئی فرنچائز کوئٹہ کیولری کا کپتان مقرر کر دیا گیا ہے۔فاسٹ بولر محمد عامر پر بھرپور اعتماد کا اظہار کرتے ہوئے فرنچائز مینجمنٹ نے انہیں ٹیم کا کپتان بنا دیا ہے، عامر بطور قائد پہلی مرتبہ ٹی 10 فارمیٹ میں شریک ہوں گے اور انہیں نوجوان اسکواڈ کی رہنمائی کے لیے بہترین انتخاب قرار دیا جا رہا ہے۔
ٹیم انتظامیہ کے مطابق عامر کا تجربہ، جارحانہ بولنگ اسٹائل اور میدان میں جارحانہ جذبہ کوئٹہ کیولری کو مضبوط ٹیم کے طور پر ابھارے گا۔ٹیم مینجمنٹ کا کہنا ہے کہ محمد عامر نہ صرف نئی گیند سے خطرناک ثابت ہوں گے بلکہ بولرز کے لیے رہنمائی کا اہم کردار بھی ادا کریں گے۔
کوئٹہ کیولری نے اس سال متوازن سکواڈ تشکیل دیا ہے جس میں سکندر رضا، عباس آفریدی، محمد وسیم جونیئر، عرفان خان نیازی، خزیمہ بن تنویر اور عرفات منہاس جیسے اہم کھلاڑی شامل ہیں۔
عامر نے کپتانی ملنے پر خوشی کا اظہار کرتے ہوئے کہا کہ کوئٹہ کیولری کو میدان میں ایک فائٹنگ یونٹ کے طور پر پیش کریں گے اور شائقین کو بہترین کرکٹ دیکھنے کو ملے گی۔
انہوں نے کہا کہ ٹی 10 فارمیٹ تیز، دلچسپ اور فیصلہ کن ہوتا ہے اور وہ ٹیم کے ساتھ بھرپور محنت کریں گے۔واضح رہے کہ ابوظہبی ٹی 10 لیگ 18 نومبر سے شروع ہوگی جس میں دنیا بھر کے نامور کرکٹرز ایکشن میں نظر آئیں گے۔ کرکٹ شائقین کوئٹہ کیولری اور محمد عامر کی قیادت میں شاندار کارکردگی کی توقع کر رہے ہیں۔
مزید پڑھیں: طورخم بارڈر افغان شہریوں کی واپسی کے لئےآج کھول دیا جائے گا
