اسلام آباد( اے بی این نیوز) اسلام آباد الیکٹرک سپلائی کمپنی نے بجلی کے نئے کنکشن لینے والوں کے لیے بائیو میٹرک تصدیق کو لازمی قرار دے دیا۔
آئیسکو کے چیف ایگزیکٹو انجینئر چوہدری خالد محمود اور نادرا ٹیکنالوجیز کے سی ای او عمر خان آزاد کے درمیان حال ہی میں ایک معاہدہ طے پایا تھا جس کے بعد اسلام آباد الیکٹرک سپلائی کمپنی (آئیسکو) نے اعلان کیا ہے کہ اب بجلی کے تمام نئے کنکشن اور دوبارہ کنکشن کے لیے بائیو میٹرک تصدیق لازمی ہو گی۔
نئے بائیو میٹرک تصدیقی نظام کا مقصد جعلی اور غیر قانونی کنکشنز کو ختم کرنا ہے اور اس بات کو یقینی بنانا ہے کہ میٹر کنکشن فراہم کرنے سے پہلے تمام صارفین کی شناخت کی درستگی سے تصدیق کی جائے۔
بائیو میٹرک تصدیق سے صارفین کے تازہ ترین ریکارڈ حاصل کرنے میں بھی مدد ملے گی، جس سے کمپنی کے لیے ادائیگی کی تاریخوں کو ٹریک کرنا اور بقایا واجبات کو کم کرنا آسان ہو جائے گا۔
نئے نظام کے نفاذ کے بعد نادہندگان واجبات ادا کیے بغیر نئے کنکشن حاصل نہیں کر سکیں گے۔
نادرا ٹیکنالوجیز کے ساتھ معاہدے پر دستخط کی تقریب سے خطاب کرتے ہوئے انجینئر چوہدری خالد محمود نے کہا کہ IESCO صارف دوست اقدامات اور ڈیجیٹلائزیشن کے ذریعے کسٹمر سروس کو بہتر بنانے کے لیے پرعزم ہے۔
مزید پڑھیں:خیبر پختونخوا کے مختلف علاقوں میں 4.3 شدت زلزلے کے جھٹکے
