اسلام آباد (اے بی این نیوز        ) ڈی جی آئی ایس پی آر نے کہا ہے کہ سہیل وڑائچ کا کالم من گھڑت ہے، آرمی چیف نے برسلز میں کسی سیاسی معاملے پر بات نہیں کی۔

ڈی جی آئی ایس پی آر لیفٹیننٹ جنرل احمد شریف نے واضح کیا ہے کہ آرمی چیف نے برسلز میں کسی سیاسی معاملے پر بات نہیں کی اور نہ ہی معافی کا ذکر کیا۔

اسلام آباد میں میڈیا کے نمائندوں سے گفتگو کرتے ہوئے پاک فوج کے ترجمان کا کہنا تھا کہ برسلز کی تقریب میں سینکڑوں افراد موجود تھے، جہاں صرف تصاویر لی گئیں۔

ڈی جی آئی ایس پی آر نے کہا کہ آرمی چیف نے نہ تو پی ٹی آئی اور نہ ہی اس کے بانی کے بارے میں بات کی اور نہ ہی کسی صحافی کو انٹرویو دیا۔

انہوں نے سہیل وڑائچ کی خبر کو مسترد کرتے ہوئے کہا کہ یہ من گھڑت کہانی ہے جو ذاتی تشہیر اور مفاد کے لیے گھڑی گئی ہے۔

انہوں نے کہا کہ اداروں کو خبر شائع کرنے سے پہلے ذمہ داری کا مظاہرہ کرنا چاہیے تھا۔ یہ افسوس ناک ہے کہ ایک سینئر صحافی نے بھی غیر ذمہ داری کا مظاہرہ کیا۔

لیفٹیننٹ جنرل احمد شریف نے مزید کہا کہ جس نے بھی غیر قانونی کام کیا ہے اسے قانون کا سامنا کرنا ہوگا۔

تاہم انہوں نے کہا کہ فوج ایک ذمہ دار ادارہ ہے اور میڈیا کو بھی ہوشیاری کا مظاہرہ کرنا چاہیے۔

ڈی جی آئی ایس پی آر نے اس بات کا اعادہ کیا کہ برسلز تقریب میں نہ تو پی ٹی آئی کا ذکر کیا گیا اور نہ ہی معافی کی پیشکش کی گئی۔ یہ سب صرف ایک صحافی کی ذاتی تشہیر کی کوشش تھی جو کہ نامناسب رویہ ہے۔

مزید پڑھیں  :9 مئی ، عمران خان کی ضمانت منظور ،جانئے کتنے مقدمات میں سرخرو ہو ئے