تہران (اے بی این نیوز) ایرانی پارلیمنٹ نے ایک اہم اور تاریخی فیصلہ کرتے ہوئے آبنائے ہرمز کو بند کرنے کی منظوری دے دی ہے۔ ایرانی میڈیا کے مطابق اس قرارداد کو پارلیمنٹ میں پیش کیا گیا جہاں اراکین نے اسے کثرتِ رائے سے منظور کر لیا۔ یہ اقدام عالمی سطح پر ایک بڑا ردعمل پیدا کر سکتا ہے کیونکہ آبنائے ہرمز دنیا کی سب سے اہم بحری گذرگاہوں میں سے ایک ہے، جہاں سے عالمی تیل کی ترسیل کا ایک بڑا حصہ گزرتا ہے۔
تاہم، اس فیصلے پر حتمی عمل درآمد ابھی باقی ہے کیونکہ ایرانی نظام کے مطابق ایسے اہم قومی سلامتی سے متعلق معاملات کی توثیق سپریم نیشنل سیکیورٹی کونسل دیتی ہے۔ یہ کونسل ایران کا اعلیٰ ترین سیکیورٹی ادارہ ہے جو ریاستی پالیسیوں کے نفاذ اور قومی مفادات کی نگرانی کے فرائض انجام دیتا ہے۔ کونسل کی منظوری کے بعد ہی اس فیصلے کو عملی شکل دی جا سکے گی۔
سیاسی مبصرین کے مطابق ایران کا یہ فیصلہ ممکنہ طور پر خلیج میں جاری کشیدگی اور مغربی ممالک کی جانب سے عائد پابندیوں کے جواب میں کیا گیا ہے۔ اس فیصلے کے بعد نہ صرف خطے میں سفارتی ہلچل پیدا ہو سکتی ہے بلکہ عالمی منڈی میں تیل کی قیمتوں پر بھی اس کے اثرات مرتب ہو سکتے ہیں۔
مزید پڑھیں :ایران پرامریکی حملےکےبعدآئی اےای اےکاہنگامی اجلاس کل طلب
