لاہور (اے بی این نیوز ) وزیر اعلیٰ پنجاب کی حکومت کو قائم ہوئے ایک سال مکمل ہو گیا۔ ایک سال مکمل ہونے پر مریم نواز نے کارکردگی رپورٹ بھی عوام کے سامنے پیش کی۔ کارکردگی کو دیکھتے ہوئے وزیراعلیٰ نے کابینہ میں توسیع کا فیصلہ کیا ہے۔
وزیراعلیٰ پنجاب مریم نواز کی موجودہ کابینہ میں 5 معاونین خصوصی سمیت 16 ارکان ہیں۔ کابینہ میں شامل 7 وزراء کا تعلق لاہور سے ہے جبکہ باقی 9 وزراء کا تعلق پنجاب کے دیگر اضلاع سے ہے۔ پاکستان مسلم لیگ نواز کے صدر نواز شریف نے پنجاب کے ہر ڈویژن کے لیگی ایم پی ایز سے ملاقات کی، ان سے انٹرویوز کیے جس کے بعد پنجاب کابینہ میں توسیع کا فیصلہ کیا گیا۔
میاں نواز شریف کے گرین سگنل کے بعد 10 سے 12 ارکان کے نام شارٹ لسٹ کرکے وزیراعلیٰ کو بھجوا دیے گئے ہیں جب کہ پنجاب کے نئے وزراء کی حلف برداری رواں ہفتے متوقع ہے۔
ذرائع کا کہنا ہے کہ ابتدائی طور پر یہ دیکھا گیا ہے کہ کابینہ میں ہر ڈویژن کو کتنی نمائندگی حاصل ہے۔ اس تناسب سے ہر ڈویژن سے ایک وزیر کو صوبائی کابینہ میں شامل کیا جائے گا۔
جن ناموں کو شارٹ لسٹ کیا گیا ہے ان میں بیگم ذکیہ شاہنواز، رانا محمد اقبال، منشاء اللہ بٹ، کرنل (ر) ایوب ، سلمان نعیم، رانا طاہر اقبال، ملک اسد کھوکھر، ملک آصف بھا، اسامہ لغاری، یاور زمان شامل ہیں۔ ان میں سے کچھ کو وزیر اعلیٰ کا معاون خصوصی بنایا جائے گا اور کچھ کو نئی وزارتیں دی جائیں گی۔
کابینہ میں توسیع کے بعد کئی وزارتوں میں ردوبدل کا امکان ہے۔ امکان ہے کہ صوبائی وزیر صہیب بھرتھ سے وزارت قانون کا اضافی قلمدان واپس لے لیا جائے گا۔ اس طرح صوبائی وزیر رانا سکندر سے ہائر ایجوکیشن کی وزارت واپس لے لی جائے گی۔

مزید پڑھیں :بنوں میں 2 زوردار دھماکے،گھروں کے دروازے اور کھڑکیاں لرز اٹھیں