کراچی(نیوز ڈیسک )چاند کے لیے پاکستان کا پہلا سیٹلائٹ مشن آئی کیوب قمرآج چین کی ہینان خلائی لانچ سائٹ سے روانہ ہوگا۔انسٹی ٹیوٹ آف اسپیس ٹیکنالوجی کی کور کمیٹی کے رکن ڈاکٹر خرم خورشید نے بتایا کہ پاکستان کا سیٹلائٹ مشن تین سے چھ ماہ تک چاند کے گرد چکر لگائے گا۔
مزید پڑھیں: آڈیو لیکس کیس: بینچ پر اعتراض واپس لینے کی آئی بی کی متفرق درخواست بھی خارج
ان کا کہنا تھا کہ یہ مشن پاکستانی وقت کے مطابق دوپہر 2 بج کر 18 منٹ پر سیٹلائٹ خلائی مشن کے لیے روانہ ہوگا اور یہ سیٹلائٹ پانچ دن میں قمری مدار میں پہنچ جائے گا۔ڈاکٹر خورشید نے بتایا کہ اس مشن کے ذریعے پاکستان کو چاند کی تصاویر اس کے سیٹلائٹ سے تحقیق کے لیے حاصل ہوں گی۔
2022 میں، چینی قومی خلائی ایجنسی نے ایشیا پیسیفک اسپیس کارپوریشن آرگنائزیشن (اے پی ایس سی او) کے ذریعے رکن ممالک کو مفت میں چاند کے مدار تک پہنچنے کا ایک منفرد موقع فراہم کیا۔اے پی ایس سی او کی تجویز پر رکن ممالک نے اپنے منصوبے بھیجے تھے۔
اے پی ایس سی او کے رکن ممالک میں پاکستان، بنگلہ دیش، چین، ایران، پیرو، جنوبی کوریا، تھائی لینڈ اور ترکی شامل ہیں۔انسٹی ٹیوٹ آف اسپیس ٹیکنالوجی نے پاکستان کی جانب سے ایک مجوزہ منصوبہ بھی پیش کیا، آٹھ ممالک میں سے صرف پاکستان کے منصوبے کو قبول کیا گیا۔
