راولپنڈی(نیوزڈیسک) 190 ملین پاؤنڈ کیس : احتساب عدالت نے عمران خان اور بشریٰ بی بی پر فرد جرم عائد کردی۔جج ناصر جاوید نے اڈیالہ جیل میں 190 ملین پاؤنڈ کیس کی سماعت کی ،سابق خاتون اول بشریٰ بی بی کو بنی گالہ سے اڈیالہ جیل منتقل کیا گیا۔
بانی پی ٹی آئی کی طرف سے بیرسٹر سلمان صفدر، عمیر نیازی اور دیگر وکلا عدالت میں پیش ، سماعت کے موقع پر عمران خان ، بشریٰ بی بی کمرہ عدالت میں موجود تھے، عدالت نے دونوں ملزمان کی موجودگی میں فرد جرم پڑھ کر سنائی تاہم ملزمان نے صحت جرم سے انکار کردیا۔ نیب کے ڈپٹی پراسیکیوٹر سردار مظفر عباسی نے دلائل دیئے۔
مزید یہ بھی پڑھیں:الیکشن کمیشن دھاندلی کا مرکز، جلد احتجاج کی کال دونگا، عمران خان
جج نے عمران خان سے سوال کیا کہ آپ پرفریم چارج کیا جارہا ہے آپ بتائیں آپ گلٹی ہیں یا نہیں، اس پر عمران خان کا کہنا تھا کہ چارج شیٹ پڑھ کر کیا کروں مجھے علم ہے اس میں کیا لکھا ہے، ہم اس کیس میں تاخیر نہیں چاہتے، 8 فروری سے پہلے نیب کو جلدی تھی، اب ہم چاہتےہیں سزا جلدی ہو۔
جج نے استفسار کیا کہ خان صاحب، آپ پہلے بتائیں آپ کے دانتوں کا چیک اپ ہوا کہ نہیں،اس پر عمران خان نے کہا کہ ابھی تک دانتوں کا چیک اپ نہیں ہوا جیل انتظامیہ نے کہا تھا اتوار کو ڈاکٹر آئے گا، اب جیل انتظامیہ کہہ رہی ہے اگلے اتوار کو ڈاکٹر آئے گا۔عدالت نے کیس کی آئندہ سماعت 6 مارچ تک ملتوی کرتے ہوئے کیس کے 58 گواہان میں سے 5 گواہان کو شہادتیں ریکارڈ کرانے کیلئے طلب کرلیا۔علاوہ ازیں عدالت نے عمران خان کے طبی معائنے، دانتوں کے چیک اپ کے لیے جنرل فزیشن اور ڈینٹسٹ کی فراہمی کی درخواست منظور کرلی۔
