ٹورنٹو (اے بی این نیوز) آنجہانی پنجابی گلوکار سدھو موسے والا کے دو سالہ چھوٹے بھائی شبدیپ سنگھ سدھو کی ٹورنٹو کنسرٹ میں ویڈیو سوشل میڈیا پر وائرل ہو گئی، جس پر مداحوں کی جانب سے جذباتی ردعمل سامنے آ رہا ہے۔
تفصیلات کے مطابق، 9 اکتوبر کو کینیڈا کے شہر ٹورنٹو کے سکوشیا بینک ایرینا میں سدھو موسے والا کے ’’سائنڈ ٹو گاڈ‘‘ (Signed to God) ہولوگرام ورلڈ ٹور کے افتتاحی شو کے دوران شبدیپ سنگھ سدھو نے اپنے بڑے بھائی کے مشہور انداز ’’تھاپّی‘‘ کی نقل کی۔ ران پر ہاتھ مارنے کے اس مخصوص انداز کو دیکھ کر مداحوں نے محبت اور جذبات کا اظہار کیا۔
اس موقع پر شبدیپ کے والدین، بالکور سنگھ اور چرن کور بھی اسٹیج پر موجود تھے۔ ’’چھوٹا سدھو‘‘ کے نام سے مشہور بچے کی ویڈیو سوشل میڈیا پر تیزی سے پھیل گئی۔
کنسرٹ میں ہولوگرام ٹیکنالوجی، تھری ڈی پروجیکشنز، سنیماٹک ویژولز اور اسٹیج ایفیکٹس کے ذریعے سدھو موسے والا کی پرفارمنس کو دوبارہ پیش کیا گیا۔ شو کے ساتھ ان کے مقبول گانے ’’295‘‘ کی نئی میوزک ویڈیو بھی جاری کی گئی، جس میں گلوکار کی اپنے اہل خانہ کے ساتھ پہلے سے ریکارڈ شدہ فوٹیج شامل ہے۔
واضح رہے کہ سدھو موسے والا، جن کا اصل نام شبدیپ سنگھ سدھو تھا، 29 مئی 2022 کو بھارتی ریاست پنجاب کے ضلع مانسا کے گاؤں جواہرکے میں فائرنگ کے واقعے میں ہلاک ہو گئے تھے۔ وہ پنجابی موسیقی کی نمایاں شخصیات میں شمار ہوتے تھے اور اپنے منفرد انداز، طاقتور بولوں اور مقبول گانوں کے باعث دنیا بھر میں پہچانے جاتے تھے۔
مزیدپڑھیں: خیبرپختونخوا ، ایمرجنسی اور گورنر راج کی توثیق، قومی اسمبلی اور سینٹ کے اجلاس آج ہونگے
