Your theme is not active, some feature may not work. Buy a valid license from stylothemes.com

عمران خان کا دورہر شعبے میں تباہی کی مانند ثابت ہوا ، قمر زمان کائرہ

لالہ موسی(نیوز ڈیسک)وزیر اعظم کے مشیر برائے امور کشمیر و گلگت بلتستان قمر زمان کائرہ نے کہا ہے کہ اتحادی حکومت نے ملک کی بھاگ ڈور پاکستان کی سا لمیت کی خاطر سنبھالی اور ملک کو اس تباہی اور بربادی سے محفوظ رکھا جس دھانے پر عمران خان ملک کو پہنچا چکے تھے۔انہوں نے ان خیالات کا اظہار لالہ موسی میں دو کروڑ چوہتر لاکھ روپے کی لاگت سے لالہ موسی ڈنگہ لنک روڈ کے تعمیراتی کام کی افتتاحی تقریب کے موقع پر علاقے کے عوام سے خطاب کرتے ہوئے کیا ۔ انہوں نے کہا کہ عمران خان کا دور پاکستان کے ہر شعبے میں تباہی کی مانند ثابت ہوا ،عمران خان نے گزشتہ چار سال میں ملک کو عالمی سطح پر تنہا کیا اور سعودی عرب، چین ، ترکی اور ملائیشیا جیسے ممالک جنہوں نے ہر قسم کے حالات میں پاکستان کا ساتھ دیا ان ممالک سے عمران خان نے پاکستان کے سفارتی تعلقات کو خراب کیا۔ انہوں نے کہا کہ اس کے برعکس پاکستان کے موجودہ نوجوان وزیر خارجہ بلاول بھٹو زرداری اپنے نانا ذولفقار علی بھٹو اور محترمہ بینظیر بھٹو کی میراث کو ثابت کرتے ہوئے سفارتی محاذ پر لاجواب کامیابیاں حاصل کر رہے ہیں ، عمران خان ملک کو غیر مستحکم کرنے کے لیے پارلیمان، الیکشن کمیشن اور دیگر اہم اداروں کو بےجا تنقید کا نشانہ بنا رہے ہیں۔ انہوں نے کہا کہ عمران خان نے افغانستان سے دہشتگردوں کو پاکستان آنے کی اجازت دی جس کی وجہ سے آج پھر بلوچستان اور خیبرپختونخوا سمیت پورے ملک میں سیکورٹی کی صورتحال خراب ہو رہی ہے۔ انہوں نے واضح کیا کہ پاکستان کے آئین اور قانون کو نہ ماننے والوں سے کسی قسم کی رعایت نہیں برتی جائے گی اور ریاست کی رٹ کو ہر حال میں برقرار رکھا جائے گا۔ قمر زمان کائرہ نے کہا کہ اس میں کوئی شک نہیں ہے کہ ملک میں لوگ مہنگائی سے دوچار ہیں جس پر قابو پانے کی کوششیں کی جا رہی ہیں۔ انہوں نے کہا کہ یوکرین روس جنگ اور ملک میں حالیہ سیلاب کی وجہ سے مہنگائی میں اضافہ ہوا ہے، صوبائی حکومتوں پر بھی زور دیا کہ وہ مہنگائی قابو کرنے کے لیے ناجائز منافع خوری اور ذخیرہ اندوزی کا فوری خاتمہ کریں ، انہوں نے کہا کہ موجودہ پنجاب حکومت چند دنوں کی مہمان ہے اور اس کا جلد خاتمہ ہو جائے گا جس سے پنجاب میں دھونس دھاندلی اور لاقانونیت کا بھی خاتمہ ہو گا ۔انہوں نے کہا کہ ایک طرف آج پنجاب حکومت گجرات تحصیل میں اربوں روپے کے فنڈز خرچ کر رہی ہے اور اس کے برعکس پاکستان تحریک انصاف سے تعلق رکھنے والی تحصیل کھاریاں کے عوامی نمائندے اپنی ہی حکومت سے قلیل ترقیاتی فنڈز لینے سے بھی قاصر ہیں ۔ انہوں نے کہا کہ مشکل صورتحال کے باوجود وہ عوام کی زندگیوں میں آسانیاں پیدا کرنے اور پاکستان کی خدمت کی خاطر اپنی سیاست جاری رکھے ہوئے ہیں اور اپنے کردار اور اصولوں کی وجہ سے کبھی بھی ان کی آنکھیں اپنی حکومت، جماعت اور عوام کے سامنے نہیں جھکی ہیں ، انہوں نے اس موقع پر وزیر اعظم کا بھی شکریہ ادا کیا کہ جنہوں نے مشکل صورتحال کے باوجود ترقیاتی فنڈز فراہم کیے ہیں۔اس سے قبل قمر زمان کائرہ نے دو کروڑ چوہتر لاکھ روپے کی لاگت سے لالہ موسی ڈنگہ لنک روڈ سڑک کے افتتاح کے لیے نقاب کشائی کی۔ اس موقع پر کرنانہ کے عوام نے قمر زمان کائرہ کا تاریخی اور شاندار استقبال کیا۔