کراچی کے شہریوں کو سرد موسم کے لیے ابھی کچھ انتظار کرنا پڑ سکتا ہے۔ محکمہ موسمیات کی پیش گوئی کے مطابق کراچی میں سردیوں کا آغاز رواں سال دسمبر کے وسط میں متوقع ہے، جبکہ نومبر کے دوران دن نسبتاً گرم اور راتیں کچھ ٹھنڈی رہنے کا امکان ہے۔
محکمہ موسمیات کی جانب سے جاری کردہ موسمی صورتِ حال کے مطابق کراچی میں آنے والے ہفتوں کے دوران گرم اور خشک موسم برقرار رہ سکتا ہے۔ اکتوبر کے اختتام تک شہر میں دن کا درجہ حرارت 36 سے 38 ڈگری سینٹی گریڈ رہنے کا امکان ظاہر کیا گیا، جبکہ 6 نومبر تک درجہ حرارت 37 ڈگری سینٹی گریڈ کے قریب رہ سکتا ہے۔
پیش گوئی کے مطابق 6 نومبر کے بعد دن کے درجہ حرارت میں بتدریج کمی متوقع ہے اور پارہ تقریباً 35 ڈگری سینٹی گریڈ تک آسکتا ہے۔ نومبر کے دوران دن کا درجہ حرارت 33 سے 35 ڈگری جبکہ رات کا درجہ حرارت 19 سے 22 ڈگری سینٹی گریڈ رہنے کا امکان ہے۔
اس صورتِ حال کے باعث کراچی میں دن کے وقت گرمی محسوس ہوسکتی ہے، تاہم رات کے اوقات میں موسم نسبتاً خوشگوار اور ٹھنڈا ہونے کی توقع ہے۔ شہر میں باقاعدہ سردی کی شدت بڑھنے کے لیے دسمبر کے وسط تک انتظار کرنا پڑ سکتا ہے۔
دوسری جانب مری، کوٹلی ستیاں اور کہوٹہ سمیت بالائی علاقوں میں تیز ہواؤں، بارش اور ژالہ باری کے باعث سردی میں اضافہ ہوا ہے۔ فراہم کردہ رپورٹ کے مطابق مری میں درجہ حرارت 8 ڈگری سینٹی گریڈ تک گر گیا، جبکہ بعض علاقوں میں بجلی کی فراہمی بھی متاثر ہوئی۔
مری کی ضلعی انتظامیہ نے ندی نالوں میں طغیانی اور لینڈ سلائیڈنگ کے خدشات کے پیش نظر الرٹ جاری کیا ہے۔ ریسکیو 1122 اور متعلقہ اداروں کو ہائی الرٹ پر رکھنے کی اطلاع بھی دی گئی ہے۔
شہریوں اور سیاحوں کو ہدایت کی گئی ہے کہ غیر ضروری سفر سے گریز کریں، پھسلن والی سڑکوں پر احتیاط سے گاڑی چلائیں اور سفر سے پہلے موسم اور سڑکوں کی تازہ صورتِ حال معلوم کرلیں۔
