اسلام آباد (اے بی این نیوز) – پاکستان اور بھارت کے درمیان امریکی ثالثی کے تحت طے پانے والی جنگ بندی کے صرف چند گھنٹے بعد بھارت نے ایک بار پھر سیز فائر معاہدے کی خلاف ورزی کی ہے۔ عسکری ذرائع کے مطابق بھارتی فورسز نے کنٹرول لائن کے برنالہ سیکٹر میں پتنی کے مقام پر شدید فائرنگ کی۔
ذرائع نے بتایا کہ فائرنگ کے دوران ایک مشتبہ ڈرون اور میزائل کی پرواز کی ویڈیوز بھی منظر عام پر آئی ہیں، جو مبینہ طور پر برنالہ کے نالی علاقے سے فلمائی گئی ہیں، جو سماہنی اور بنڈالہ کے قریب واقع ہے۔
یہ واقعہ اس وقت پیش آیا جب دونوں ممالک نے چند گھنٹے قبل ہی مکمل اور فوری جنگ بندی پر اتفاق کیا تھا، جس کا اعلان سابق امریکی صدر ڈونلڈ ٹرمپ نے کیا تھا۔ پاکستان کی طرف سے اس خلاف ورزی پر شدید ردعمل کا امکان ظاہر کیا جا رہا ہے۔
