اسلام آباد (اے بی این نیوز) ٹیلی کام کمپنی زونگ کے اسلام آباد ہیڈ آفس سے تقریباً 150 ملازمین کو مبینہ طور پر ملازمت سے فارغ کیے جانے کا معاملہ سامنے آیا ہے۔ متاثرہ ملازمین کے مطابق انہیں اچانک ملازمت ختم کیے جانے سے آگاہ کیا گیا اور مبینہ طور پر کسی علیحدگی پیکیج یا معاوضے کی پیشکش نہیں کی گئی۔
متاثرہ عملے کا کہنا ہے کہ برطرفیوں کا عمل اچانک کیا گیا، جس کے باعث کئی ملازمین کو شدید مالی مشکلات کا سامنا ہے۔ ایک متاثرہ ملازم کے مطابق اس نے زونگ میں تقریباً 14 سال خدمات انجام دیں، تاہم ملازمت کے خاتمے کا طریقہ کار اس کے لیے انتہائی مایوس کن رہا۔
ملازمین کے مطابق انہیں ملازمت ختم ہونے کے بعد متبادل روزگار تلاش کرنے کا مشورہ دیا گیا، جبکہ دیگر اداروں میں رضاکارانہ علیحدگی، گولڈن ہینڈ شیک یا دیگر مالی پیکیجز کی مثالیں موجود ہیں۔
زونگ، چائنا موبائل کی ذیلی کمپنی CMPak کے طور پر پاکستان میں ٹیلی کام خدمات فراہم کرتا ہے اور ملک بھر میں وسیع صارفین کا نیٹ ورک رکھتا ہے۔
رپورٹ کے مطابق پاکستان کی ٹیلی کام انڈسٹری اس وقت تنظیم نو کے مرحلے سے گزر رہی ہے۔ یوفون اور ٹیلی نار کے انضمام کے بعد بھی شعبے میں ملازمتوں اور تنظیمی ڈھانچے میں تبدیلیوں کے امکانات ظاہر کیے جا رہے ہیں۔
قانونی ماہرین کے مطابق ملازمت کے معاہدے، سروس کی نوعیت اور متعلقہ قوانین کے تحت برطرف ملازمین کو نوٹس، واجبات یا دیگر قانونی حقوق حاصل ہو سکتے ہیں، تاہم ہر ملازم کے معاملے کا فیصلہ اس کی ملازمت کی شرائط کے مطابق ہوگا۔
واضح رہے کہ زونگ کے اسلام آباد ہیڈ آفس سے تقریباً 150 ملازمین کی برطرفی کا دعویٰ تاحال غیر مصدقہ ہے۔ کمپنی کی جانب سے اس معاملے پر باضابطہ مؤقف سامنے آنے کے بعد صورتحال مزید واضح ہو سکے گی۔
مزید پڑھیں: ستاروں کی روشنی میں آپ کا آج کا دن کیسا رہے گا؟
