لاہور(نیوزڈیسک)سابق وفاقی وزیر داخلہ اور مسلم لیگ (ن) کے سینئر رہنما رانا ثنا اللہ نے کہا ہے کہ سانحہ نو مئی کے ملزموں کو الیکشن لڑنے نہیں دیں گے۔ہمارا مقصد میاں نواز شریف کی قیادت میں پاکستان کو معاشی اور سیاسی بحران سے نکالنا ہے۔ نواز شریف اکیس اکتوبر کو وطن واپس آکر مینار پاکستان پر جلسے میں قوم سے خطاب کریں گے، اُن کی واپسی سے پاکستان ترقی کے ایک نئے سفر کا آغاز کرے گا۔جمعرات کو پارٹی اجلاس میں کارکنان سے خطاب کرتے ہوئے رانا ثنا اللہ نے کہا کہ چیئرمین پی ٹی آئی اپنے تکبر کا شکار ہوئے اور اب کہہ رہے ہیں کہ الیکشن لڑنے نہیں دیا جارہا، جبکہ وہ انتخابات لڑنے کے لیے معافی کا تقاضہ بھی کررہے ہیں، ایسا پاکستان سمیت دنیا بھر میں کوئی قانون نہیں ہے کہ جرم کرو اور پھر الیکشن لڑنے کیلیے معافی کے طلب گار بن جاؤ۔
