اسلام آباد (نیوزڈیسک) آرمی چیف جنرل عاصم منیر سے سرکردہ کاروباری شخصیات کی وزیرخزانہ اسحق ڈار کی قیادت میں ملاقات ،انہوں نے کہا کہ ملک کے ڈیفالٹ کا خطرہ ٹل چکا ، ملک ترقی کرے گا اور ہم ایک خوشحال قوم بن کر ابھریں گے۔ملاقات کے حوالے سے باضابطہ طور پر کوئی بیان سامنے نہیں آیا لیکن ذرائع کا کہنا ہے کہ آرمی چیف پوری ملاقات کے دوران پرامید نظر آئے اور اس اعتماد کا اظہار کیا کہ موجودہ معاشی مشکلات پر قابو پا لیا جائے گا۔انہوں نے کاروباری افراد سے کہا کہ وہ پرعزم اور پراعتماد رہیں، آرمی چیف نے مختلف شعبوں سے تعلق رکھنے والے کاروباری افراد کو بتایا کہ قوم پر مشکلات آتی ہیں اور ہمیں مشکل حالات کا سامنا ہے لیکن بدتر حالات کو ہم پیچھے چھوڑ چکے ہیں اور ہم قائم و دائم رہیں گے۔حکومت کو توقع ہے کہ ان ممالک سے پیشگی سرمایہ (ایڈوانس ایکوئٹی) ملے گا، سول اور ملٹری قیادت نے مل کر دوست ممالک کو اس سرمایہ کاری کیلئے قائل کیا۔ذرائع کا کہنا تھا کہ آرمی چیف سے کاروباری افراد نے سوال کیا کہ اسٹیبلشمنٹ سیاست دانوں کو ایک جگہ بٹھانے کیلئے کوشش کیوں نہیں کر رہی تاکہ ملک کو درپیش سنگین چیلنجز کا مقابلہ کیا جا سکے، کاروباری افراد نے آرمی چیف کو بتایا کہ قوم توقع کرتی ہے کہ فوج معاشرے میں مزید افرا تفری اور تفریق کی اجازت نہیں دے گی، آرمی چیف سے ملاقات کیلئے آئے ان دس کاروباری افراد میں سے 5 کا تعلق کراچی جبکہ 5 کا لاہور سے تھا۔آرمی چیف جنرل عاصم منیر نے اسلامی تعلیمات کا حوالہ دیتے ہوئے کہا کہ پاکستان موجودہ امتحان میں نکلنے سے کامیاب ہو جائے گا۔ملاقات میں شامل ایک شخص نے نام ظاہر نہ کرنے کی شرط پر کہا کہ کاروباری افراد نے آرمی چیف سے ملاقات کی درخواست کی تھی، وزیر خزانہ کو آرمی چیف نے سیشن میں شرکت کیلئے مدعو کیا تھا، کاروباری افراد نے اس ملاقات کو انتہائی کامیاب قرار دیا۔آرمی چیف اور وزیر خزانہ نے تاجر برادری کو یقین دلایا کہ آئی ایم ایف کی تمام پیشگی شرائط کو پورا کر دیا گیا ہے اور چند روز میں ہی معاہدہ ہو جائے گا۔انہوں نے بتایا کہ آئی ایم ایف نے یہ بھی کہا ہے کہ معیشت میں تیزی لانے کیلئے دوست ممالک سے کیے جانے والے معاہدوں کو بھی دستاویزی شکل دی جائے۔