مشترکہ دفاعی معاہدے سے قبل نماز جمعہ کی ادائیگی کے لیے پاکستان، سعودی عرب اور ترکیہ کی اعلیٰ قیادت ایک ہی صف میں شریک ہوئی۔ اس موقع پر خطے میں امن، استحکام، اسلامی اتحاد اور خوشحالی کے لیے خصوصی دعائیں بھی مانگی گئیں۔
ذرائع کے مطابق سعودی ولی عہد اور وزیراعظم شہزادہ محمد بن سلمان، وزیراعظم پاکستان محمد شہباز شریف اور ترکیہ کے صدر رجب طیب اردوان نے تاریخی دفاعی معاہدے سے قبل نماز جمعہ ادا کی۔ ان کے ہمراہ پاکستان کے فیلڈ مارشل سید عاصم منیر بھی موجود تھے۔
نماز جمعہ کی ادائیگی کے بعد رہنماؤں نے امت مسلمہ کی سلامتی، باہمی اتحاد اور خطے میں پائیدار امن کے لیے دعا کی۔ اس موقع پر تینوں ممالک کے درمیان برادرانہ تعلقات اور باہمی تعاون کے فروغ کے عزم کا بھی اظہار کیا گیا۔
بعد ازاں پاکستان، سعودی عرب اور ترکیہ کی قیادت نے مشترکہ دفاعی تعاون کے حوالے سے اہم ملاقاتوں میں شرکت کی، جہاں علاقائی سلامتی، دفاعی روابط اور مشترکہ حکمت عملی سے متعلق امور پر تبادلہ خیال کیا گیا۔
تجزیہ کاروں کے مطابق مشترکہ دفاعی معاہدے سے قبل نماز جمعہ میں تینوں ممالک کی قیادت کی مشترکہ شرکت نہ صرف اسلامی یکجہتی کی علامت ہے بلکہ اس سے باہمی اعتماد اور اسٹریٹجک شراکت داری کو بھی مزید تقویت ملنے کی توقع کی جا رہی ہے۔
