اسلام آباد (اے بی این نیوز) ملک بھر میں عید الاضحیٰ 27 مئی کو منائی جائے گی، اس سال 5 سے 6 سرکاری تعطیلات کا امکان ہے۔
تفصیلات کے مطابق مرکزی رویت ہلال کمیٹی نے ملک بھر میں ذی الحجہ 1447 ہجری کا چاند نظر آنے کی تصدیق کردی جس کے بعد پاکستان میں عید الاضحیٰ 27 مئی بروز بدھ کو منائی جائے گی۔
چاند کی تصدیق کے ساتھ ہی عوام نے عیدالاضحی کی تعطیلات کی پلاننگ شروع کردی۔ سرکاری کیلنڈر کے مطابق، عید الاضحی کی تعطیلات 27 مئی سے 29 مئی (بدھ سے جمعہ) تک مقرر ہیں، جو ہفتہ اور اتوار کی ہفتہ وار تعطیلات کے ساتھ مل کر 5 دن کا وقفہ کرتی ہیں۔
تاہم، حکومتی ذرائع کا کہنا ہے کہ اس بات کا قوی امکان ہے کہ چھٹیاں ایک دن پہلے یعنی منگل 26 مئی سے شروع ہوں گی تاکہ تارکین وطن کو اپنے آبائی شہروں کا سفر کرنے اور اپنے اہل خانہ کے ساتھ عید منانے کی اجازت دی جا سکے۔
اگر وفاقی حکومت کی جانب سے یہ منظوری دی جاتی ہے تو عید کی چھٹیاں 6 دن تک جاری رہیں گی۔ عوام اب اس حوالے سے وفاقی حکومت کی جانب سے باضابطہ نوٹیفکیشن کا انتظار کر رہے ہیں۔
خیال رہے کہ مرکزی رویت ہلال کمیٹی کے چیئرمین مولانا عبدالخبیر آزاد نے گزشتہ روز پریس کانفرنس کرتے ہوئے کہا تھا کہ ملک کے مختلف حصوں سے اسلامی چاند نظر آنے کی اطلاع موصول ہوئی ہے جس کے بعد متفقہ طور پر فیصلہ کیا گیا کہ یکم ذی الحجہ 18 مئی بروز پیر کو ہوگی۔
واضح رہے کہ اس سے قبل سپارکو نے بھی پیش گوئی کی تھی کہ ذوالحجہ کے نئے چاند کی پیدائش 17 مئی کو دن 1 بجکر 15 منٹ پر ہوئی تھی اور عید 27 مئی کو ہونے کا امکان ہے۔
مزید پڑھیں:کاروباری اوقات سےمتعلق نیا نوٹیفکیشن جاری
