اسلام آباد (نیوزڈیسک)پاکستان تحریک انصاف (پی ٹی آئی) کے سینیٹر اعجاز چوہدری نے کہاہے کہ کیا اس ملک میں متفقہ دستور یا آئین نہیں ہے؟اسلام آباد میں پریس کانفرنس کرتے ہوئے انہوں نے کہا کہ ہم آئین و قانون کے تحت مزاحمت جاری رکھیں گے، مہنگائی سے تباہ حال قوم کی مشکلات کا سبب نہیں بنیں گے، ہماری جدوجہد آئین کی پامالی کو روکنے کے لیے ہے۔اعجاز چوہدری کا کہنا ہے کہ ہم نے جیل بھرو تحریک کا فیصلہ کیا ہے، اس سے قبل کہ یہ حکومت جھوٹے مقدمات میں ڈالے ہم جیلیں بھریں گے، یہ آزادی کی جدوجہد استعمار کے خلاف ہے۔انہوں نے کہا کہ عالمی استعمار پاکستان کے خلاف سازشوں میں مصروف ہے۔پی ٹی آئی رہنما کا مزید کہنا تھا کہ ایک ماہ قبل پنجاب کی اسمبلی کو تحلیل کیا گیا، آئین 90 دن میں الیکشن کا پابند کرتا ہے۔ان کا یہ بھی کہنا ہے کہ انتخابات کا اعلان نہ الیکشن کمیشن نے کیا نہ نگراں حکومت کر سکی۔