کراچی (اے بی این نیوز) سندھ حکومت نے کرپشن کی شکایات پر مختلف محکموں کے خلاف سخت کارروائی کا فیصلہ کیا ہے۔
وزیر انسداد بدعنوانی سردار محمد بخش مہر کی زیر صدارت اجلاس میں شکایات پر فوری کارروائی کی منظوری دی گئی۔
اجلاس میں چیئرمین اینٹی کرپشن سید ذوالفقار علی شاہ اور ڈی جی اینٹی کرپشن امتیاز علی ابڑو نے شرکت کی، اجلاس میں محکمہ اینٹی کرپشن کی سالانہ کارکردگی اور بدعنوانی کی شکایات پر بریفنگ دی گئی۔
بریفنگ کے مطابق صوبے کے 22 محکموں کے خلاف 13 ہزار 603 بدعنوانی کی شکایات موصول ہوئیں جن میں سب سے زیادہ شکایات ریونیو، لوکل گورنمنٹ، پولیس اور تعلیم کے محکموں کے خلاف ہیں۔
اجلاس کو بتایا گیا کہ 2025 میں بدعنوانی کی 37.37 فیصد شکایات کا ازالہ کیا گیا جبکہ 812 مقدمات انسداد بدعنوانی کی عدالت میں بھیجے گئے اور فیلڈ میں ٹریپ اور سرپرائز وزٹ بھی کیے گئے۔
وزیر برائے انسداد بدعنوانی سردار محمد بخش مہر نے ہدایت کی کہ افسران کے خلاف بدعنوانی کی شکایات پر فوری اور شفاف کارروائی کی جائے کیونکہ عوام کے اعتماد کا تحفظ حکومت کی اولین ترجیح ہے۔
مزید پڑھیں:پاک امریکا مشترکہ فوجی مشقوں کا آغاز
