اسلام آباد(نیوزڈیسک) نیوزی لینڈ کے اوپننگ بیٹر مارٹن گپٹل کا کہنا ہے کہ وہ پہلی مرتبہ پاکستان میں کھیلنے کے چیلنج کیلئے تیار ہیں۔ مارٹن گپٹل کا کہنا تھا کہ پاکستان سپر لیگ کے آٹھویں ایڈیشن کیلئے وہ پرجوش ہیں۔ مارٹن گپٹل 2021ء میں کراچی کنگز کی جانب سے کورونا سے متاثر ہونے والے پی ایس ایل میں ابوظہبی مرحلہ کھیل چکے ہیں، اس بار وہ کوئٹہ کی جانب سے پاکستان میں میچز کھیلیں گے۔پاکستان میں کھیل کر سیکھنے کا بھی اچھا موقع ملے گا۔دنیا کی مختلف لیگز میں 305 ٹی ٹوئنٹی اننگز کھیل کر 8734 رنز بنانے والے مارٹن گپٹل کا کہنا ہے کہ پی ایس ایل کا معیار کافی اچھا ہے تاہم وہ اس لیگ کا کسی دوسری لیگ سے موازنہ نہیں کریں گے کیوں کہ ایسا کرنا ان کے لیے ممکن نہیں۔مارٹن گپٹل کا کہنا ہے کہ یہاں اچھی فاسٹ بولنگ، اچھا اسپن اٹیک اور بہترین بیٹنگ سب ہی کچھ ہے۔ایک سوال پر انہوں نے کہا کہ ٹی ٹوئنٹی چیمپئنز لیگ ایک اچھا ٹورنامنٹ تھا لیکن اب اتنی کرکٹ ہو گئی ہے کہ چیمپئنز لیگ کو دوبارہ بحال کیا جائے تو یہ کیلنڈر کو مزید مصروف کردے گا لیکن اگر ایسا ہوا تو وہ ضرور اس ٹورنامنٹ کو ایک بار پھر کھیلنا چاہیں گے۔
