پرو
لاہور (اے بی این نیوز    ) پنجابی زبان تے ادب دے عظیم شاعر تے دانشور پروفیسر علی ارشد میر دی یاد وچ دو روزہ 17واں میر پنجابی میلہ پنجاب انسٹی ٹیوٹ آف لینگویج، آرٹ اینڈ کلچر وچ منعقد کیتا گیا۔ پنجابی زبان تے ادب نال وابستہ ادیباں، فنکاراں، شاعراں، دانشوراں دے نال نال عوام نے وی اپنی ماں بولی نال محبت دا اظہار کرن لئی میلے وچ بھرپور شرکت کیتی۔ میلے دوران ماں بولی پنجابی تے پروفیسر علی ارشد میر دی شاعری نال جڑے مختلف موضوعات تے ہوون والے سموادھاں وچ سیر بھرویں گفتگو کیتی۔
میلے دے پہلے دن وچار وٹاندریاں وچ پنجاب دی موجودہ سیاست بارے الیاس گھمن نے اپنے وچاراں اتے لوڑاں تھوڑاں بارے وچار سانجھے کیتے۔ دوسرے سموداھ وچ پنجابی دریاواں دے مستقبل بارے حکومتی رویہ، پنجاب وچ انتہا پسندی دے ودھدے رجحان تے پنجاب دے دریاواں دے پانی اُتے موجود ڈیمز دے مسئلے نوں عامر ریاض ٹوٹو تے ڈاکٹر تیمور رحمان نے اُجاگر کیتا۔ انہاں نے پاکستان بھر وچ دریاواں دے پانی اُتے بنے ڈیمز نوں بنیاد بنا کے ہوندی سیاست تے تنقید کردے ہوئے اوہناں مسئلیاں دے حل لئی اہم لوڑاں دی سانجھ کیتی۔ کُجھ ہور سموداھاں وچ پنجاب دیاں لوک داستاناں دی روایت، پنجابی نابری دا بنیاد پرست پکھ، پنجاب دے کساناں دے مسائل تے علی ارشد میر تے جدید پنجابی نظم بارے دانشوراں تے ادیباں نے کُھل کے وچاراں نوں پیش کیتا۔ انہاں وچ پروفیسر غلام حسین ساجد، ڈاکٹر سعید بھٹہ، ڈاکٹر کلیان سنگھ، فاروق ندیم، راجہ صادق اللہ تے عرفان کامریڈ شامل سن۔ وچار وٹاندریاں دی مجمانی دے فرائض ڈاکٹر سرمد فروغ، اختر خان، سعدیہ کامریڈ تے فاروق ندیم نے ادا کیتے۔
کہانی دربار وچ طاہر سندھو، غلام حسین ساجد،زویا اختر، پروفیسر زبیر احمد، کرامت مغل، اعجاز علی، سعید انجم کھوکھر، صابر علی صابر،عثمان باجوہ تے احتشام کاظم شامل ہوئے۔ میلے وچ چترکلا تے پُورنے کاری دا مقابلہ وی کروایا گیا، جس وچ پروفیسر علی ارشد میر دی شاعری تے پنجاب دی ثقافت نوں موضوع بنایا گیا۔
میلے دے دوسرے دن پنجاب دی سیاست تے پنجابی تنظیمیں، پنجابی کھوج پرکھ دے ابلاغ وچ پیش آن والے مسائل، نوجوان پنجابی ادیب دے مسئلے، صوبیاں دی تقسیم دا ثقافت اُتے اثر، حکومت دے ثقافتی سرپرستی دے دعوے تے پنجابی زبان و ادب توں دوری، تھیٹر تے پنجابی ثقافت ورگے موضوعات اُتے معروف دانشوراں نے گفتگو کیتی۔ اس موقع تے الیاس گھمن، عمار شاہ کاظمی، ڈاکٹر ریاض انجم، زبیر احمد، اقبال قیصر، صابر علی صابر تے ڈاکٹر عطا اللّٰہ عالی، حسن جعفر نے وچاراں دی سانجھ کیتی۔ اس دیہاڑ جدید مہان پنجابی غزل گو شاعر تجمل کلیم نوں خصوصی خراجِ تحسین وی پیش کیتا گیا۔ شرکاء وچ رائے محمد ناصر خان، نصیر احمد تے جی اے نجم شامل سن جنہاں نے تجمل کلیم دی غزل نوں آنے والے شاعراں لئی مشال قرار دِتا۔ معروف سیاست دان، دانشور اتے قانون دان اعتزاز احسن تے سینئر صحافی حسین نقی نے وی خصوصی شرکت کیتی۔
پچھلی ریت نوں ٹوردیاں اس سال وی پنجابی ادب دیاں مختلف کھیتراں وچ علی ارشد میر ایوارڈ 2025 دِتے گئے۔ شعری ادب (نظم) وچ “اسم ہوا وچ” لئی مظہر ترمذی، شعری ادب (غزل) وچ “درداں نال بھیالی” لئی حکیم ارشد شہزاد، نثری ادب (ناول) وچ “مِٹھی دوزخ” لئی صابر رضا، نثری ادب (افسانہ) وچ “نیوندرا” لئی طاہر سندھو، سوانیاں لئی خصوصی پُرسکار نثری ادب (افسانہ) وچ “کھاری” لئی عائشہ اسلم، کھوج پرکھ وچ “وگدی اے راوی” لئی ثناور چدھڑ، پنجابی ترجمہ وچ بھانبڑ (یان فوسے) لئی خالد فرہاد دھاریوال، بال ادب وچ باتاں دادی دیاں – بال لوک باتاں (تیجا حصہ) لئی ڈاکٹر محمد ایوب، تے دینی ادب وچ نعت عبادت لئی سلطان کھاروی نوں ایوارڈ نوازیہ گیا۔
جبکہ پنجابی سیوک ایوارڈ معروف صحافی تے دانشور حسین نقی نوں انہاں دیاں شاندار خدمات دے اعتراف وچ دتا گیا۔ مزید پروفیسر علی ارشد میر دی شاعری تے زندگی دے موضوعات اُتے ہون والے چترکلا مقابلے وچ نمایاں پوزیشن حاصل کرن والے ودھیارتیاں نوں انعامات تے سرٹیفیکیٹس وی تقسیم کیتے گئے۔
میلے دے دونوں دن موسیقی تے صوفی رقص نے لوکائی دا چت پرچایا۔ ڈاکٹر تیمور رحمان (لال بینڈ)، شجاعت علی خان، شیراز علی خان، حسنین عباس لونے والا، احمد لونے والا، ناصر بیراج، سہیل اسجد، اقصیٰ نور، ساحل خان، بلال اقبال قوال پارٹی تے لوک گلوکار علی عمران شوکت نے لوک گیت گا کے ڈھیر داد وصولی۔ صوفی رقص ندیم عباس تے تنویر نے پیش کیتا۔
میلے دا اختتام ٹُری ریت کرکے کُل پنجاب مشاعرہ نال ہویا، جس دی صدارت راجہ صادق اللّٰہ نے کیتی۔ مشاعرے وچ رائے ناصر، ویر سپاہی، اکرام عارفی، ڈاکٹر صغریٰ صدف، نصیر احمد نصیر، صابر علی صابر، افضل ساحر، بوٹا شاکر، اصغر بھٹی، زاہد جرپالوی، احمد نعیم ارشد، مشتاق قمر، نسیم گلفام، سہیل اسجد، طاہر نعیم، رفیق رضا، نبیل نجم، جی اے نجم، اسرار مسعود ساجد، ڈاکٹر سرمد، محمود محسن، عرفان کامریڈ تے علی جوشا انور فکر نے اپنا کلام پیش کیتا تے عوام توں ڈھیر محبتاں وصول کیتیاں۔

مزید پڑھیں :عمران خان کے جیل میں شب و روز،کیا باتیں اور کس سےکرتے ہیں،کھانا کیسا ملتا ہے،اب جیل کے کس حصہ میں ہیں، انجینئر محمد علی مرزا کے انکشافات