لندن (اے بی این نیوز)پاکستان تحریک انصاف (پی ٹی آئی) کے بانی اور سابق وزیراعظم عمران خان کے بیٹے قاسم خان اور سلیمان خان نے جنوری 2026 میں پاکستان کا دورہ کرنے کا اعلان کر دیا۔
انہوں نے کہا کہ اپنے والد سے ملاقات کریں گے۔قاسم خان نے غیر ملکی ٹی وی چینل انٹرویو دیتے ہوئے کہا کہ ہم منصوبہ بندی کر رہے ہیں کیونکہ حکام نے واضح کر دیا ہے کہ ہمیں آنے کی اجازت ہے، ہم نے ویزوں کے لیے درخواست دے دی ہے ابھی نہیں آئے لیکن توقع ہے کہ عمل جلد مکمل ہو جائے گا۔
دونوں بھائیوں نے عمران خان کی جیل میں قید کے حالات پر شدید تشویش کا اظہار کرتے ہوئے کہا کہ سابق وزیراعظم کو ڈیتھ سیل میں رکھا گیا ہے اور وہ تنہا قید میں ہیں اور ان کے ساتھ کوئی رابطہ نہیں ہے۔
قاسم خان نے اپنی نانی کی حالیہ وفات کا ذکر بھی کیا جو عمران خان کے لیے ماں جیسا کردار ادا کرتی تھیں اور کہا کہ وہ اس بارے میں والد سے بات کرنا چاہتے ہیں۔ان سے جب سوال پوچھا گیا کہ کیا وہ اپنے والد کو کسی ڈیل کے ذریعے رہائی کے لیے مشورہ دیں گے تو قاسم خان نے جواب دیاکہ اگر وہ کوئی ڈیل کر کے انگلینڈ میں رہ جائیں تو انہیں تکلیف ہوگی کہ انہوں نے ملک کو تباہی کے حوالے کر دیا۔
یہ ان کی زندگی کا مشن ہے اور اس کا احترام کیا جانا چاہیے۔سلیمان خان نے پاکستان کی سیاسی صورتحال کو مایوس کن قرار دیا لیکن کہا کہ عمران خان سمجھوتہ کرنے والے نہیں ہیں۔ انہوں نے بین الاقوامی دباؤ کو تبدیلی کا مؤثر ذریعہ قرار دیا۔
مزید پڑھیں: بھارتی گلوکار کمارسانو نے سابقہ اہلیہ کے خلاف مقدمہ درج کرادیا
