لاہور ( اے بی این نیوز ) شاہد آفریدی نے کہا ہے کہ ملک کو نقصان پہنچانے والوں کا احتساب ضروری ہے۔ سابق قومی کرکٹر شاہد خان آفریدی نے کہا ہے کہ ملک کو نقصان پہنچانے والے عناصر کا احتساب ہونا چاہیے اور پاک فوج ہماری اپنی فوج ہے جس پر ہمیں فخر ہے۔
ایک تقریب سے خطاب کرتے ہوئے شاہد آفریدی نے پاکستان سپر لیگ میں دو نئی ٹیموں کے اضافے کو خوش آئند قرار دیا۔ ان کا کہنا تھا کہ ٹیموں کی تعداد بڑھنے سے نوجوان کھلاڑیوں کو آگے آنے کے مزید مواقع ملیں گے، جو پاکستان کرکٹ کے مستقبل کے لیے مثبت قدم ہے۔
شاہد آفریدی نے کہا کہ پی ایس ایل پاکستان کا اپنا مضبوط برانڈ بن چکا ہے اور اس کے روڈ شوز لیگ کی بڑھتی ہوئی مقبولیت کا واضح ثبوت ہیں۔ ان کے مطابق پی ایس ایل نے نہ صرف مقامی بلکہ بین الاقوامی سطح پر بھی پاکستان کرکٹ کا مثبت تشخص اجاگر کیا ہے۔
قومی ٹیم کے حوالے سے بات کرتے ہوئے سابق آل راؤنڈر نے کہا کہ اب مزید تجربات کی گنجائش نہیں، ورلڈ کپ کے لیے ٹیم کو جلد از جلد فائنل کیا جانا چاہیے۔ انہوں نے زور دیا کہ ورلڈ کپ سے قبل ہونے والی سیریز میں کھلاڑیوں کی بار بار تبدیلی ٹیم کے لیے نقصان دہ ثابت ہو سکتی ہے۔شاہد آفریدی کا کہنا تھا کہ بگ بیش لیگ میں پاکستانی کھلاڑیوں کی شمولیت سے انہیں عالمی معیار کا تجربہ حاصل ہوگا، جو مستقبل میں قومی ٹیم کی کارکردگی بہتر بنانے میں مددگار ثابت ہوگا۔
مزید پڑھیں :سرکاری ملازمین کا الائونس ڈبل کر دیا گیا،جا نئے کس کس کو کو فائدہ پہنچے گا
