بلوچستان(اے بی این نیوز)مغربی ہوائیں بلوچستان میں داخل ہونے کیلئے تیار، بارشوں کے نئے سلسلے کی پیشگوئی
محکمہ موسمیات نے آج ملک کے بیشتر علاقوں میں سرد رہنے کی پیشگوئی کر دی۔
محکمہ موسمیات کے مطابق ملک کے بیشتر علاقوں میں موسم سرد اور خشک جبکہ پہاڑی علاقوں میں صبح اور رات کے اوقات میں شدید سرد رہنے کا امکان ہے۔
پنجاب اور خیبر پختونحوا کے میدانی علاقوں میں صبح اور رات کے اوقات میں دھند پڑنے کی توقع ہے۔ اگلے چند روز کے دوران شمالی علاقوں میں دن اور رات کے درجہ حرارت میں مزید کمی کا امکان ظاہر کیا گیا ہے۔
پنجاب اور خیبر پختونحوا کے میدانی علاقوں میں دھند کی شدت میں بتدریج اضافے کی توقع ہے۔ کم سے کم درجہ حرارت اسکردو میں منفی 10 ڈگری سینٹی گریڈ ریکارڈ کیا گیا۔
دوسری جانب محکمہ موسمیات نے بلوچستان کے مختلف اضلاع میں دسمبر میں گرج چمک کے ساتھ شدید بارشوں کی پیشگوئی کر رکھی ہے، مغربی ہواؤں کا طاقتور سلسلہ 6 سے 10 دسمبر کے دوران بلوچستان میں داخل ہوگا۔
بارشوں کا یہ سلسلہ وقفے وقفے سے پورے مہینے جاری رہنے کی پیشگوئی کی گئی ہے۔ ژوب، شیرانی، موسیٰ خیل، بارکھان، کوہلو، سبی، لسبیلہ، آواران، کیچ، گوادر، پنجگور، خضدار، قلعہ سیف اللہ، چاغی، نوشکی، واشک اور مستونگ سمیت صوبے کے بیشتر اضلاع میں گرج چمک کے ساتھ بارشوں کی پیشگوئی کی گئی ہے۔
بعض مقامات پر گرج چمک کے ساتھ موسلا دھار بارشیں جبکہ بالائی علاقوں میں برف باری ہونے کا امکان ظاہر کیا گیا ہے۔
مزید پڑھیں۔برطانوی حکومت کا کم از کم تنخواہ میں اضافے کا فیصلہ
