اسلام آباد (اے بی این نیوز) ضمنی انتخاب کا میدان سج گیا اور کل 6 قومی اسمبلی کے حلقوں میں پولنگ ہوگی، جن میں پنجاب کے 5 اور ہری پور کا ایک حلقہ شامل ہے۔
مسلم لیگ ن کے ٹکٹ ہولڈرز کا مقابلہ آزاد امیدواروں سے ہوگا جب کہ ڈی جی خان میں صرف اتحادی جماعتیں آمنے سامنے ہوں گی اور مسلم لیگ ن کے قادر کھوسہ اور پیپلز پارٹی کے دوست محمد کھوسہ آمنے سامنے ہوں گے۔
سب سے بڑا معرکہ این اے 18 ہری پور میں ہوگا جہاں پی ٹی آئی کی حمایت یافتہ شہر ناز کا مسلم لیگ ن کے بابر نواز خان سے سخت مقابلہ ہے۔ یہ نشست عمر ایوب کی نااہلی سے خالی ہوئی تھی جس کے لیے انہوں نے اپنی اہلیہ کو میدان میں اتارا تھا۔
لاہور میں قومی اسمبلی کے حلقہ این اے 129 میں مسلم لیگ ن کے حافظ نعمان اور آزاد امیدوار ارسلان احمد بھی مدمقابل ہیں۔
این اے 185 ڈی جی خان میں اتحادی جماعتیں آمنے سامنے ہوں گی اور مسلم لیگ ن کے سردار قادر اور پیپلز پارٹی کے دوست محمد کھوسہ آمنے سامنے ہوں گے۔
فیصل آباد کے حلقہ 96 میں مسلم لیگ ن کے امیدوار بلال بدر کا مقابلہ اپنی ہی پارٹی کے سابق امیدوار نواب شیر وسیر سے ہوگا۔
این اے 104 میں مسلم لیگ ن کے امیدوار راجہ دانیال اور آزاد امیدوار رانا عدنان آمنے سامنے ہوں گے۔
این اے 143 میں مسلم لیگ ن کے طفیل جٹ کا مقابلہ آزاد امیدوار ضرار اکبر چوہدری سے ہوگا۔
مزید پڑھیں:ضمنی الیکشن: ذرائع ابلاغ کے لیے ضابطہ اخلاق جاری
