لاہور ( اے بی این نیوز)30 سال سے قائم پرندہ مارکیٹ کو بھی داتا دربار توسیعی منصوبے کے تحت گرا دیا گیا۔
دکانداروں نے الزام لگایا ہے کہ رات کے وقت دکانیں منہدم ہونے سے ان کے کئی قیمتی پرندے اور جانور بھی ملبے تلے دب کر ہلاک ہو چکے ہیں۔
تاہم ڈپٹی کمشنر لاہور موسیٰ رضا اور ایل ڈی اے کے ترجمان نے اس الزام کی تردید کرتے ہوئے کہا ہے کہ آپریشن سے قبل سامان اور پرندوں کو بحفاظت منتقل کیا گیا تھا۔
لاہور کے علاقے بھاٹی گیٹ میں جہاں 30 سال سے محکمہ اوقاف کی زمین پر پرندوں کی منڈی بھی قائم تھی، 2 روز قبل رات گئے داتا دربار توسیعی منصوبے کے تحت کیے گئے آپریشن میں ان دکانوں کو مسمار کر دیا گیا تھا۔
دکانداروں کے مطابق ایل ڈی اے اور ٹیپا نے بغیر کسی اطلاع کے اچانک آپریشن کیا جس کی وجہ سے ان کے کئی قیمتی پرندے اور جانور بھی ملبے تلے دب کر مر گئے۔
سوشل میڈیا پر ویڈیو دیکھ کر جانوروں سے محبت کرنے والے پریشان ہیں۔ ان کا کہنا ہے کہ پرندوں کو چھوڑنے کے لیے دکانداروں کو وقت دیا جانا چاہیے تھا۔
مزید پڑھیں:فضل الرحمان کی آصف زرداری، بلاول سے ملاقات!27ویں آئینی ترمیم پر مشاورت متوقع
