اسلام آباد (رضوان عباسی سے)کابینہ ڈویژن نے جولائی تا ستمبر 2025 کی سہ ماہی کے لیے توشہ خانہ کا ریکارڈ جاری کر دیا ہے۔ اس فہرست میں وزیراعظم شہباز شریف اور صدر مملکت آصف علی زرداری سمیت اعلیٰ حکومتی عہدے داروں کے وصول شدہ تحائف کی تفصیلات شامل ہیں۔
نائب وزیراعظم اسحاق ڈار، وزیر دفاع خواجہ آصف، وزیر داخلہ محسن نقوی، وزیر ریلوے حنیف عباسی اور وزیر بجلی اویس لغاری بھی اس سہ ماہی میں قیمتی تحائف وصول کرنے والوں میں شامل ہیں۔
اسی طرح چیئرمین سینیٹ، اسپیکر قومی اسمبلی، سیکریٹری سینیٹ، وزیر اطلاعات عطاء تارڑ، وزیر آئی ٹی شہزاہ فاطمہ، معاون خصوصی طارق فاطمی، وزیر مملکت بیرسٹر عقیل ملک اور سیکریٹری داخلہ کو بھی تحائف ملے۔
مالی سال کی پہلی سہ ماہی میں قیمتی گھڑیاں، ڈیکوریشن پیسز، پینٹنگز، پرفیوم، شیلڈز، کارپٹ، ٹی سیٹ، رائفل، وال کلاک، باول، پین اور ڈائری سمیت دیگر تحائف وصول کیے گئے، جو تمام وصول کنندگان نے توشہ خانہ میں جمع کروا دیے۔
کابینہ ڈویژن تحائف کا تخمینہ کر رہا ہے اور عمل جاری ہے۔
واضح رہے کہ شہباز شریف کی حکومت نے اس سے قبل 2002 سے جون 2025 تک کے توشہ خانہ ریکارڈ کے ساتھ ساتھ 1997 سے 2001 تک کا ریکارڈ بھی عوام کے لیے جاری کر چکی ہے۔
یہ اقدام شفافیت اور عوام کے لیے معلومات کی فراہمی کے ضمن میں ایک اہم پیش رفت کے طور پر دیکھا جا رہا ہے۔
مزید پڑھیں۔بھارتی لابی آئی سی سی پر قابض ہے، سابق میچ ریفری نے بھارتی سازشوں کا پول کھول دیا
