اسلام آباد ( اے بی این نیوز )اسلام آباد ( اے بی این نیوز ) قومی احتساب بیورو (نیب) نے 40 ارب روپے کے کوہستان اسکینڈل میں کارروائی کرتے ہوئے مختلف مقامات پر چھاپے مار کر مزید آٹھ ملزمان کو گرفتار کر لیا ہے۔ نیب ذرائع کے مطابق اب تک گرفتار ہونے والے ملزمان کی تعداد 26 تک پہنچ گئی ہے، جب کہ مزید گرفتاریوں کا امکان ظاہر کیا جا رہا ہے۔
ذرائع کے مطابق گرفتار کیے گئے دس ملزمان نے نیب سے پلی بارگین کی درخواستیں جمع کرادی ہیں، تاہم مرکزی ملزم ایوب ٹھیکیدار کی پلی بارگین کی استدعا مسترد کر دی گئی ہے۔ نیب حکام کا کہنا ہے کہ پلی بارگین کرنے والوں میں قیصر اقبال اور ان کی اہلیہ بھی شامل ہیں، جن کے اکاؤنٹس سے دس ارب روپے کی نشاندہی ہوئی تھی۔
تحقیقات میں اب تک پانچ ارب روپے سے زائد کی ریکوری کی جا چکی ہے، جبکہ کیس میں چالیس سے زیادہ افراد کے ملوث ہونے کے شواہد سامنے آئے ہیں۔ نیب کے مطابق اس بڑے مالیاتی اسکینڈل میں سرکاری افسران، ٹھیکیداروں اور بینک حکام کی ملی بھگت سے جعلی کمپنیوں اور دستاویزات کے ذریعے سرکاری خزانے سے 40 ارب روپے نکلوائے گئے تھے۔
گرفتار ہونے والے افراد میں ڈسٹرکٹ اکاؤنٹس آفس کوہستان کے الفت علی، عبدالباسط جدون، محکمہ سی اینڈ ڈبلیو کے عبدالباسط، ٹھیکیدار سرتاج خان، یحییٰ اور شیرباز شامل ہیں۔ نیب نے مزید مشتبہ شخصیات کی نشاندہی کے بعد ان کے خلاف بھی تحقیقات تیز کر دی ہیں۔
مزید پڑھیں :سوشل میڈیا پر شرانگیزی ونفرت کے خلاف زیروٹالرنس پالیسی نافذ
