لاہور(اے بی این نیوز)ڈالرز کی اونچی اڑان اور ایل سی سیز نہ کھلنے کی وجہ سے مہنگائی کی شرح میں خطرناک حدتک اضافہ ہوگیا ہے ۔ ڈالرز کی قدر میں اضافہ اور پاکستانی کرنسی کی گراوٹ کے باعث اشیاء خوردونوش کی قیمتیں بھی آسمان سے باتیں کرنے لگیں ۔ گھی، آئل ،آٹا ، دالوں کے علاوہ بیسن اور دیگر ضروریات زندگی کی اشیاء میں ہوشربا اضافے سے شہریوں کی نیندیں اڑا دی ہیں ۔تفصیلات کے مطابق ڈالرز کے آفٹر شاک کا سلسلہ بدستور جاری ہے جس کی وجہ سے اشیاء خوردونوش کی قیمتوں میں غیر معمولی اضافے ہورہا ہے ،اوپن مارکیٹ میں ایک ماہ کے دوران درجہ اول اور دوم آئل کی قیمت میں بالترتیب71روپے سے 102روپے تک اضافہ ریکارڈ کیا گیا ، سرکار ی جاری ہونے والی ریٹ لسٹ کے مطابق چاول ، دالوں اور بیسن کی قیمتوں میں بھی 25روپے سی75روپے تک اضافہ کر دیا گیا ۔ درجہ اول آئل کی فی لیٹر قیمت 600سے610روپے تک پہنچ گئی ہے ۔ ایک ماہ کے دوران درجہ اول آئل کی قیمت میں71روپے تک اضافہ دیکھاگیا ہے جس سے پانچ لیٹر کی پیٹی 355روپے اضافے سے3050روپے تک پہنچ گئی ہے۔درجہ دوم آئل کی قیمتوں میں ایک ماہ کے دوران 102روپے تک اضافہ ہوا جس سے 12لیٹر کی پیٹی کی قیمت1238روپے اضافے سے 6528روپے تک پہنچ گئی ہے جبکہ درجہ دوم گھی کی قیمت میں71روپے تک اضافہ کیا گیا ہے جس سے 12کلو کی پیٹی1132روپے اضافے سے6432روپے تک جا پہنچی ہے۔رواں ماہ ضلعی انتظامیہ کی طرف سے جاری کردہ سرکاری لسٹ میں دالوں کی قیمتوں میں بھی 75روپے کلو تک اضافہ کیا گیا ہے ۔ریٹ لسٹ کے مطابق چاول سپر باسمتی 45روپے اضافے سے300روپے،دال چنا باریک30روپے اضافےسے235روپے،دال چنا سپیشل35روپے اضافےسے250روپے،دال مسور موٹی 25روپے اضافے سے255روپے،دال ماش امپورٹڈ دھلی ہوئی 75روپے اضافے سے410روپے،دال ماش چھلکے والی امپورٹڈ 55روپے اضافےسے370،دال مونگ 30روپے اضافے سے255،کالا چنا موٹا لوکل35روپے اضافے سے235،کالا چنا باریک لوکل35روپے اضافے سے220روپے،سفید چنا 75روپے اضافےسے360روپے جبکہ بیسن40روپے اضافےسے255روپے فی کلو مقرر کی گئی ہے ۔