پشاور ( اے بی این نیوز       )کے پی کابینہ میں حالیہ ردوبدل پر بات کرتے ہوئے معاون خصوصی اطلاعات بیرسٹر سیف نے کہا ہے کہ یہ اقدام بانی تحریک انصاف کے ویژن کو آگے بڑھانے کے لیے کیا گیا ہے ان کا کہنا تھا کہ جو عناصر اس تبدیلی کو سیاسی رنگ دے کر مخالفت کر رہے ہیں وہ درحقیقت بانی پی ٹی آئی کے ویژن کے مخالف ہیں

بیرسٹر سیف نے بتایا کہ حالیہ ملاقات میں بانی پی ٹی آئی نے وزیراعلیٰ خیبر پختونخوا علی امین گنڈاپور کو حکومتی کارکردگی مزید بہتر بنانے کی ہدایت دی تھی اور ان پر مکمل اعتماد کا اظہار کرتے ہوئے کابینہ میں ردوبدل کا اختیار بھی دیا تھا

انہوں نے کہا کہ کابینہ میں تبدیلی کا مقصد حکومتی امور کو مزید مؤثر بنانا ہے اور یہ وزیر اعلیٰ کا صوابدیدی اختیار ہے کہ وہ کسی بھی وقت اپنی ٹیم میں ردوبدل کر سکتے ہیں موجودہ حالات میں بہترین ٹیم کی تشکیل وقت کی ضرورت ہے تاکہ عوام کو بہتر سہولیات فراہم کی جا سکیں

بیرسٹر سیف کا کہنا تھا کہ کابینہ میں ردوبدل ایک مثبت اور جمہوری عمل ہے جس کا مقصد صرف اور صرف عوامی خدمت کو بہتر بنانا ہے اور حکومت اسی مقصد کے لیے اقدامات کر رہی ہے

مزید پڑھیں :زلزلہ،77 افراد جان سے گئے،700 سے زائد آفٹر شاکس،جا نئے تفصیلات