اسلام آباد ( اے بی این نیوز )وزیر اعظم پاکستان شہباز شریف نے آزاد کشمیر کی حالیہ صورتحال پر گہری تشویش کا اظہار کرتے ہوئے اس کا سخت نوٹس لیا ہے اور شہریوں سے پُرامن رہنے کی زوردار اپیل کی ہے وزیر اعظم کا کہنا ہے کہ پُرامن احتجاج ہر شہری کا آئینی و جمہوری حق ہے تاہم مظاہرین کو چاہیے کہ وہ امن عامہ کو نقصان پہنچانے سے گریز کریں وزیر اعظم نے قانون نافذ کرنے والے اداروں کو ہدایت کی ہے کہ وہ مظاہرین کے ساتھ تحمل اور بردباری سے پیش آئیں اور عوامی جذبات کا مکمل احترام یقینی بنایا جائے کسی بھی قسم کی غیر ضروری سختی سے اجتناب برتا جائے
وزیر اعظم نے حکومت کی جانب سے کشمیری عوام کے مسائل حل کرنے کے عزم کا اعادہ کیا اور مظاہروں کے دوران پیش آنے والے ناخوشگوار واقعات پر گہری تشویش کا اظہار کرتے ہوئے ان کی شفاف تحقیقات کا حکم دیا ہے وزیر اعظم نے متاثرہ خاندانوں تک فوری امداد پہنچانے کی ہدایت بھی جاری کی ہے
حکومتی سطح پر مسئلے کے پرامن حل کے لیے وزیر اعظم نے مذاکراتی کمیٹی کی توسیع کا فیصلہ کیا ہے جس میں سینیٹر رانا ثنا اللہ، وفاقی وزراء سردار یوسف، احسن اقبال، سابق صدر آزاد جموں و کشمیر مسعود خان اور قمر زمان کائرہ کو شامل کیا گیا ہے وزیر اعظم نے ہدایت کی ہے کہ مذاکراتی کمیٹی فوری طور پر مظفرآباد روانہ ہو اور مسائل کا فوری و دیرپا حل تلاش کرے
وزیر اعظم نے عوامی ایکشن کمیٹی کے اراکین اور قیادت سے اپیل کی ہے کہ وہ مذاکراتی عمل میں حکومت کے ساتھ مکمل تعاون کریں کمیٹی اپنی سفارشات اور مجوزہ حل بلا تاخیر وزیر اعظم آفس کو پیش کرے گی تاکہ مسائل کے فوری تدارک کے لیے مؤثر اقدامات کیے جا سکیں وزیر اعظم نے وطن واپسی پر مذاکراتی عمل کی براہ راست نگرانی کا اعلان بھی کر دیا ہے
مزید پڑھیں :مودی حکومت،جرائم کی شرح خطرناک حد تک بلند
