کوئٹہ (اے بی این نیوز)فیلڈ مارشل سید عاصم منیر کی ہدایت پر بلوچستان میں منشیات کے خاتمے کے لئے فیصلہ کن مہم کا آغاز کر دیا گیا۔تفصیلات کے مطابق فیلڈ مارشل سید عاصم منیر کی واضح ہدایات اور حکومت بلوچستان کی براہِ راست نگرانی میں صوبے میں منشیات کے خاتمے کے لیے فیصلہ کن مہم کا آغاز کر دیا گیا ہے۔
ترجمان نے بتایا کہ انسدادِ منشیات فورس (اے این ایف) اور مقامی اداروں کی مشترکہ کارروائیوں کے دوران کئی علاقوں میں پوست کی کاشت کو تلف کیا گیا ہے، جبکہ منشیات کی پیداوار اور ترسیل میں ملوث نیٹ ورکس کے خلاف کارروائیاں بھی جاری ہیں۔حکام کا کہنا ہے کہ اس مہم کا مقصد بلوچستان کو منشیات سے پاک کرنا اور اس ناسور کا مستقل طور پر خاتمہ کرنا ہے۔
اس کے ساتھ ساتھ دہشت گردوں اور منشیات کے نیٹ ورکس کے گٹھ جوڑ کو توڑنے کےلئے اقدامات کیے جا رہے ہیں۔مزید برآں، مقامی افراد کو متبادل روزگار کے مواقع فراہم کرنے کی منصوبہ بندی کی گئی ہے تاکہ انہیں دوبارہ منشیات کی کاشت کی طرف جانے سے روکا جا سکے۔
حکام نے زور دیا کہ منشیات، جرائم اور دہشت گردی کا گٹھ جوڑ اس پورے نیٹ ورک کو طاقت فراہم کرتا ہے، اور اس کو توڑنے کے لیے مؤثر اور پائیدار حکمت عملی اپنانا وقت کی ضرورت ہے۔
انسدادمنشیات مہم کو قومی ذمہ داری قرار دیتے ہوئے کہا گیا کہ اس جنگ میں حکومت، سکیورٹی اداروں اور معاشرے کے ہر فرد کو اپنا کردار ادا کرنا ہوگا۔
مزید پڑھیں: بھارت نے پاکستان کے خلاف نئی جارحیت کا عندیہ دے دیا
