راولپنڈی (اے بی این نیوز) فیلڈ مارشل سید عاصم منیر نے قصور سیکٹر اور ملتان کے جلال پور پیر والا میں سیلاب ریلیف کیمپوں کا دورہ کیا اور متاثرین کی آباد کاری اور بحالی میں تعاون کی یقین دہانی کرائی۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل کے دورے کا مقصد سیلاب کی موجودہ صورتحال اور جاری امدادی سرگرمیوں کا جائزہ لینا تھا۔ انہیں سیلاب سے متاثرہ علاقوں میں ریسکیو اور ریلیف آپریشنز کی تفصیلات سے آگاہ کیا گیا۔
قصور اور ملتان کے سیلاب سے متاثرہ علاقوں کے دورے کا مقصد سول انتظامیہ اور فوج کے درمیان رابطوں کو مزید بہتر بنانا تھا تاکہ متاثرہ آبادی کو موثر امداد فراہم کی جا سکے۔ اس موقع پر چیف سیکرٹری پنجاب اور سول انتظامیہ کے دیگر اعلیٰ حکام بھی موجود تھے۔
سول انتظامیہ سے گفتگو کرتے ہوئے فیلڈ مارشل نے گڈ گورننس اور عوام پر مبنی جامع ترقی کی اہمیت پر زور دیا اور کہا کہ عوام کو بار بار آنے والے سیلاب کے نقصانات سے بچانے کے لیے درکار انفراسٹرکچر کی ترقی سمیت تمام ضروری اقدامات فوری طور پر کیے جائیں۔ ریاست ہر سال قیمتی جانوں اور املاک کے ضیاع کی متحمل نہیں ہو سکتی۔
انہوں نے اس بات پر زور دیا کہ سیلاب سے متاثرہ لوگوں کو درپیش چیلنجز سے نمٹنے کے لیے سول اور عسکری اداروں کی مربوط کوششیں انتہائی اہمیت کی حامل ہیں، اس عزم کا اعادہ کیا کہ پاک فوج عوامی فلاح و بہبود کے تمام اقدامات کی بھرپور حمایت جاری رکھے گی۔
فیلڈ مارشل سید عاصم منیر نے سیلاب متاثرین سے گفتگو کرتے ہوئے ان کی بحالی اور آباد کاری کے عمل میں مکمل تعاون کی یقین دہانی کرائی۔
متاثرین نے بروقت امداد فراہم کرنے پر پاک فوج کا تہہ دل سے شکریہ ادا کیا۔
آرمی چیف نے امدادی کارروائیوں میں مصروف فوجی جوانوں، ریسکیو 1122 کے اہلکاروں اور پولیس اہلکاروں سے بھی ملاقات کی اور ان کے بلند حوصلے، آپریشنل تیاری اور مشکل ترین حالات میں قوم کی خدمت کے لیے غیر متزلزل عزم کو سراہا۔
انہوں نے لوگوں کو بروقت ریلیف اور امداد فراہم کرنے کے لیے سول انتظامیہ کے ساتھ قریبی ہم آہنگی میں ان کے روزمرہ کے کام کو سراہا۔
فیلڈ مارشل سید عاصم منیر نے لاہور، قصور اور ملتان کے سیلاب سے متاثرہ علاقوں کے علاوہ جلال پور پیر والا کا فضائی سروے بھی کیا تاکہ نقصان کی حد اور جاری امدادی سرگرمیوں کا اندازہ لگایا جا سکے۔
سیلاب سے متاثرہ علاقوں میں پہنچنے پر لاہور اور ملتان کور کے کمانڈرز نے فیلڈ مارشل کا استقبال کیا۔
مزید پڑھیں: افغانوں کو واپس چھوڑنے کیلئے جانیوالے 2 ہزار ٹرک افغانستان میں پھنس گئے
