پشاور(اے بی این نیوز)پشاور ہائی کورٹ نے الیکشن کمیشن کو پاکستان تحریک انصاف کی رہنما زرتاج گل کے خلاف مزید کارروائی سے روک دیا۔
پشاور ہائی کورٹ نے زرتاج گل کی نااہلی کے خلاف درخواست پر سماعت کی۔
سماعت کے دوران درخواست گزار کے وکیل کا کہنا تھا کہ انسداد دہشت گردی کی عدالت فیصل آباد نے زرتاج گل کو 10 سال قید کی سزا سنائی، 5 اگست کو الیکشن کمیشن نے درخواست گزار کو دیگر ارکان سمیت نااہل قرار دیا۔
جسٹس وقار احمد نے درخواست گزار کے وکیل سے پوچھا کہ آپ لاہور ہائیکورٹ کیوں نہیں گئے؟
درخواست گزار کے وکیل نے کہا کہ عمر ایوب اور شبلی فراز کی اسی طرح کی درخواستیں یہاں زیر سماعت ہیں، اسی کیس میں عمر ایوب اور شبلی فراز کو بھی نااہل کیا گیا تھا۔
جسٹس وقار احمد نے کہا کہ وہ دیگر درخواستوں کے ساتھ اس کی بھی سماعت کریں گے، آئندہ سماعت میں اس کیس کے دائرہ اختیار پر بھی آپ کو سنیں گے۔
عدالت نے الیکشن کمیشن اور دیگر فریقین سے جواب طلب کرتے ہوئے سماعت ملتوی کردی۔
مزید پڑھیں:چینی مسافر طیارے کی روس میں ہنگامی لینڈنگ
