اسلام آباد (اے بی این نیوز )9 مئی کے واقعات،سپریم کورٹ نے پی ٹی آئی کے بانی عمران خان کو 8 مقدمات میں ضمانت دے دی۔ سپریم کورٹ نے 9 مئی کے تشدد سے متعلق 8 مقدمات میں پاکستان تحریک انصاف کے بانی کی ضمانت منظور کر لی۔ چیف جسٹس یحییٰ آفریدی کی سربراہی میں تین رکنی بینچ نے سماعت کے بعد فیصلہ دیا۔
سماعت کے آغاز پر چیف جسٹس نے اسپیشل پراسیکیوٹر ذوالفقار عباس نقوی سے دو سوالات کیے۔ کیا ہائی کورٹ کے فیصلے میں دی گئی آبزرویشنز زیر التواء مقدمات کی سماعت پر اثر انداز ہوں گی؟
اگر اسی طرح کے سازشی کیس میں ضمانت ہو چکی ہے تو موجودہ کیسز میں ضمانت کیوں نہ دی جائے۔پراسیکیوٹر نے موقف اختیار کیا کہ پی ٹی آئی کے بانی تمام مقدمات میں مرکزی کردار ہیں اور ان کے خلاف گواہوں کے بیانات سمیت زبانی اور الیکٹرانک شواہد موجود ہیں۔ تاہم عدالت نے واضح کیا کہ ٹرائل کورٹ میں شواہد کا جائزہ لیا جائے گا اور سپریم کورٹ میرٹ پر آبزرویشن نہیں دے گی تاکہ ٹرائل متاثر نہ ہو۔
چیف جسٹس یحییٰ آفریدی نے کہا کہ عدالت ماضی میں سازش کے الزامات میں ضمانت دے چکی ہے، اس لیے پراسیکیوٹر کو ثابت کرنا ہو گا کہ موجودہ مقدمات مختلف ہیں۔ جسٹس حسن اظہر رضوی نے ریمارکس دیے کہ ملزم واقعے کے بعد دو ماہ تک ضمانت پر رہا، پولیس کے لیے تفتیش کے لیے کافی وقت تھا۔
عدالت نے یہ بھی قرار دیا کہ اگر پی ٹی آئی بانی نے وائس میچنگ اور دیگر سائنسی ٹیسٹ نہ کروائے تو قانونی نتائج بھگتنا ہوں گے تاہم اس معاملے کا فیصلہ بھی ٹرائل کورٹ میں کیا جائے گا۔
دلائل مکمل ہونے کے بعد سپریم کورٹ نے 9 مئی کے واقعات سے متعلق تمام 8 مقدمات میں پی ٹی آئی بانی کی ضمانت منظور کرلی۔
مزید پڑھیں :پی ٹی آ ئی اور حکومت کے ما بین مذاکرات،عمران خان کی نئی شرط منظر عام پر آگئی ،جا نئے کیا
