اسلام آباد(اے بی این نیوز) گردشی قرضہ ختم کرنے کےلئے 1275 ارب روپے کے قرض کی تقسیم پر حکومت تذبذب کا شکار ہے کیونکہ آئی پی پیز کو ادائیگیوں میں سی پیک بجلی گھروں کو نظر انداز نہیں کر سکتی۔

تفصیلات کے مطابق حکومت آئی پی پیز کو ادائیگیوں کے معاملے میں ایک نازک صورتحال سے دوچار ہے کیونکہ بجلی کے شعبے میں گردشی قرضہ ایک بار ختم کرنے کے لیے 18کمرشل بینکوں سے حاصل کیے گئے 1275ارب روپے کے قرض کو استعمال کرتے ہوئے ادائیگیوں کے وقت سی پیک کے تحت لگائے گئے چینی آئی پی پیز کو نظر انداز نہیں کیا جا سکتا، جنہوں نے اپنے پاور پرچیز ایگریمنٹس (پی پی ایز) پر نظر ثانی کرنے پر رضامندی ظاہر نہیں کی ہے۔

پاور ڈویژن کے ایک سینئر عہدیدار نے بتایا کہ یہ ایک اہم مسئلہ ہے جو متعلقہ حکام کے لیے کھڑا ہو گیا ہے کہ جب ان آئی پی پیز کے واجبات ادا کیے جائیں گے جنہوں نے اپنے پاور پرچیز ایگریمنٹس میں ترمیم کے لیے رضامندی ظاہر کی ہے، تو سی پیک کے تحت قائم بجلی گھروں کے ساتھ کیسے نمٹا جائے گا۔ سی پیک کے بجلی گھروں کو نظر انداز نہیں کیا جا سکتا کیونکہ ملک کی قیادت یہ محسوس کرتی ہے کہ بھارت کے ساتھ حالیہ جنگ میں چین نے پاکستان کی بہت مدد کی ہے۔
مزید پڑھیں: غیر رجسٹرڈ اور غیر قانونی کام کرنیوالے کال سینٹرز کیخلاف آپریشن ،درجنوں گرفتار