اسلام آباد ( اے بی این نیوز ) وزیراعظم محمد شہباز شریف نے کہا ہے کہ دشمن اس شکست کو یاد رکھے گا جو پاک فوج نے 10 مئی کو قوم کے اتحاد و اتفاق سے بھارت کو دی تھی۔ مری روڈ انٹر چینج جناح اسکوائر کے افتتاح کے موقع پر منعقدہ تقریب سے خطاب کرتے ہوئے وزیراعظم نے کہا کہ وہ ایک بار پھر قوم کو دل کی گہرائیوں سے مبارکباد پیش کرتے ہیں۔ پاکستانی فوج نے 10 مئی کو اپنی بہترین حکمت عملی اور بہادری سے بھارت کو جو شکست دی وہ اللہ تعالی کا خاص تحفہ اور مہربانی ہے۔
وزیراعظم نے جناح اسکوائر منصوبے کو 35 دنوں میں مکمل کرنے پر سی ڈی اے، متعلقہ کمپنی کے حکام اور وزیر داخلہ محسن نقوی کو مبارکباد دی اور کہا کہ اتنی کم مدت میں منصوبے کو مکمل کرنا آسان کام نہیں تھا۔
انہوں نے وفاقی دارالحکومت کی انتظامیہ اور سی ڈی اے کو ہدایت کی کہ وہ مزید تندہی، محنت اور لگن سے کام کریں اور اسلام آباد کو مزید خوبصورت بنانے کے لیے اقدامات کریں۔اس موقع پر وفاقی وزراء حنیف عباسی، طارق فضل چوہدری، طلال چوہدری کے علاوہ سی ڈی اے اور اسلام آباد پولیس کے اعلیٰ حکام بھی موجود تھے۔
وزیر داخلہ محسن نقوی نے اس موقع پر اظہار خیال کرتے ہوئے کہا کہ یہ منصوبہ 35 دن کی ریکارڈ مدت میں مکمل کیا گیا تاکہ شہریوں کو کم سے کم مشکلات پیدا ہوں۔ منصوبے کے تعمیراتی معیار پر کوئی سمجھوتہ نہیں کیا گیا اور بہترین اور معیاری تعمیر کو یقینی بنایا گیا۔انہوں نے کہا کہ فیض آباد چوک، شاہین چوک اور کشمیر چوک پر پل کو چوڑا کرنے سمیت دیگر کئی منصوبوں پر جلد کام شروع کر دیا جائے گا۔واضح رہے کہ پاکستان کی تاریخ میں پہلی بار انڈر پاس کا منصوبہ صرف 35 دن کی ریکارڈ مدت میں مکمل ہوا ہے۔
مزید پڑھیں :اسلام آباد میٹروبس کے کرایوں میں 100 فیصد تک اضافہ، 26 مئی سے اطلاق
