پشاور(اے بی این نیوز)خیبر پختونخوا کابینہ نے پہلگام واقعے کے بعد بھارتی حکومت کے رویے کی شدید مذمت کرتے ہوئے بھارت کی کسی بھی جارحیت کا منہ توڑ جواب دینے کے عزم کا اظہار کیا ہے۔
وزیراعلیٰ خیبرپختونخوا علی امین گنڈاپور نے کابینہ کے اجلاس سے خطاب کرتے ہوئے کہا کہ اگر بھارت نے اس واقعے کی آڑ میں جارحیت کی کوشش کی تو بھاری قیمت چکانی پڑے گی، ملکی سالمیت کے لیے ہم سب متحد اور قربانی دینے کے لیے تیار ہیں۔
علی امین گنڈاپور نے کہا کہ بھارتی حکومت کا جارحانہ رویہ ہمیشہ سے خطے کے امن کے لیے خطرہ رہا ہے، واقعے کے تناظر میں بھارتی حکومت کا جارحانہ رویہ افسوس ناک ہے۔انہوں نے مزید کہا کہ بھارتی حکومت اپنی نااہلی چھپانے کیلئے پاکستان کے خلاف زہر اُگل رہی ہے۔
مزید پڑھیں: ملک بھر میں دریائوں میں پانی کی آمد میں کمی،قابل استعمال ذخائر میں اضافہ
