راولپنڈی( نیوزڈیسک)سابق وزیراعظم وبانی تحریک انصاف عمران خان نے میڈیا سے مختصر گفتگو کرتے ہوئے کہا کہ حکومت سازی کیلئے پی پی پی،ن لیگ اورایم کیوایم سےاتحاد کسی صورت نہیں کرینگے ، حسن رؤف کو ان 3 جماعتوں کے علاوہ دیگر سیاسی جماعتوں کو اکٹھا کرنے کا کہہ دیا ہے۔
اڈیالہ جیل میں میڈیاسےغیررسمی گفتگو کرنے والے عمران خان کا کہنا تھا کہ انتخابات میں دھاندلی سے ملک میں عدم استحکام بڑھے گا، دھاندلی زدہ انتخابات کا معیشت پربھی برا اثر پڑے گا، میں کہتا رہا کہ آزاد اور شفاف انتخابات بحران ور مسائل سے نکلنے کا واحد حل ہیں۔
مزید پڑھیں:علی امین گنڈا پور وزیر اعلیٰ خیبر پختونخوا کیلئے نامزد
عمران خان نے کہا کہ، ’ہم سب سے پہلے انتخابی نتائج کو چیلنج کر رہے ہیں،دھاندلی زدہ نتائج کیخلاف سپریم کورٹ بھی جائیں گے۔ اب پتہ چل گیا کہ ہم آراوز الیکشن کیخلاف کیوں تھے؟۔‘عمران خان کا کہنا تھا کہ پی ٹی آئی کی جانب سے وزیراعظم کیلئے ابھی کسی نام پر اتفاق نہیں ہوا ، تاہم وزیراعلیٰ خیبرپختونخواہ کےلیے علی امین گنڈاپور کو نامزد کردیا ہے۔
عمران خان نے واضح کیا کہ جیل میں کسی بھی اعلیٰ عہدیدارسے کوئی ملاقات نہیں ہوئی۔ نوازشریف کی پریس کانفرنس ملتوی ہونے پرسمجھ گئے تھے کہ ہم جیت گئے، نواز شریف اور مریم نواز دونوں الیکشن ہارے ہیں۔عمران خان نے مزید کہا کہ عالیہ حمزہ نے جیل میں بیٹھ کر ایک لاکھ سے زائد ووٹ لیے۔
