اسلام آباد(اے بی این نیوز) اگر آپ سے کبھی غلط شخص کو ای میل بھیجنے یا ای میل میں غلطی رہ جانے کی وجہ سے پریشانی ہوئی ہے تو جی میل کا ایک پرانا مگر نہایت کارآمد فیچر آپ کے لیے بڑی سہولت ثابت ہو سکتا ہے۔

گوگل نے Undo Send فیچر کو برسوں پہلے متعارف کرایا تھا، تاہم آج بھی متعدد صارفین اس سے واقف نہیں۔ اس فیچر کی مدد سے ای میل بھیجنے کے فوراً بعد اسے واپس لیا جا سکتا ہے، جس سے غلط ای میل ایڈریس، ٹائپنگ کی غلطیوں یا آٹو کریکٹ کی وجہ سے ہونے والی مشکلات سے بچنا ممکن ہو جاتا ہے۔

یہ فیچر پہلی بار مارچ 2009 میں جی میل لیبز کے ذریعے پیش کیا گیا تھا، جبکہ 2015 میں اسے تمام صارفین کے لیے مستقل طور پر دستیاب کر دیا گیا۔جب کوئی صارف ای میل بھیجتا ہے تو اسکرین کے نچلے بائیں کونے میں چند سیکنڈ کے لیے Undo کا آپشن ظاہر ہوتا ہے۔

اس پر کلک کرتے ہی ای میل بھیجے جانے کا عمل روک دیا جاتا ہے اور صارف اسے دوبارہ ایڈٹ یا منسوخ کر سکتا ہے۔جی میل میں Undo Send کا دورانیہ بطور ڈیفالٹ 5 سیکنڈ ہوتا ہے، تاہم صارف Settings میں جا کر اسے 30 سیکنڈ تک بڑھا سکتے ہیں۔

ماہرین کے مطابق یہ فیچر عام مگر اہم غلطیوں سے بچنے کا بہترین ذریعہ ہے، کیونکہ اس کی مدد سے ای میل بھیجنے کے بعد بھی صارف کے پاس اسے درست کرنے کا موقع موجود رہتا ہے۔
مزید پڑھیں: اٹھارہ سال سے کم عمر شادی کو غیر قانونی قرار دینے کے خلاف درخواست سماعت کیلئے مقرر