کراچی ( اے بی این نیوز )کراچی میں پولیس کے شعبے میں احتساب کا عمل تیز ہو گیا ہے جہاں ساؤتھ زون میں بڑے پیمانے پر کارروائی کرتے ہوئے 19 اہلکاروں کو معطل کر دیا گیا۔ ذرائع کے مطابق یہ اقدام اینٹی کرپشن اور اینٹی اسمگلنگ ڈرائیو کے تحت کیا گیا، جس کا مقصد محکمے کے اندر موجود بدعنوان عناصر کے خلاف سخت کارروائی کرنا ہے۔
حکام کا کہنا ہے کہ کیماڑی ضلع سے تعلق رکھنے والے کچھ پولیس افسران غیر قانونی سرگرمیوں میں ملوث پائے گئے، جس پر فوری ایکشن لیتے ہوئے انہیں عہدوں سے ہٹا دیا گیا۔ معطل کیے جانے والوں میں اے ایس آئی، ہیڈ کانسٹیبل اور کانسٹیبل شامل ہیں، جو مختلف تھانوں میں تعینات تھے۔
نوٹیفکیشن کے مطابق تمام اہلکاروں کو سسپینڈڈ مین کمپنی میں منتقل کر دیا گیا ہے جو گارڈن ہیڈکوارٹر میں قائم ہے۔ معطلی کے دوران انہیں روزانہ کی بنیاد پر رول کال اور پریڈ میں شرکت لازمی قرار دی گئی ہے تاکہ نظم و ضبط برقرار رکھا جا سکے۔
ذرائع کے مطابق ان اہلکاروں کے خلاف باضابطہ تحقیقات کا آغاز کر دیا گیا ہے اور مکمل چھان بین کے بعد مزید قانونی کارروائی عمل میں لائی جائے گی۔ اس دوران ان کی تنخواہیں سرکاری قواعد و ضوابط کے مطابق جاری رہیں گی۔
اعلیٰ حکام نے متعلقہ افسران کو فوری طور پر رپورٹ پیش کرنے اور احکامات پر مکمل عملدرآمد کی ہدایت جاری کی ہے۔ سوشل میڈیا پر بھی اس خبر نے خاصی توجہ حاصل کی ہے، جہاں صارفین پولیس میں احتساب کے اس عمل کو خوش آئند قرار دے رہے ہیں اور اسے شفافیت کی جانب اہم قدم قرار دیا جا رہا ہے۔
