اسلام آباد (اے بی این نیوز )وفاقی وزیر اطلاعات عطاءاللہ تارڑنے پریس کانفرنس سے خطاب کرتے ہو ئے کہا کہ پہلگام فالس فلیگ آپریشن کے بعد پاکستان کی نیشنل سیکورٹی کمیٹی نے بھارت کو بھرپور جواب دیا۔ بھارت بوکھلاہٹ کا شکار ہو چکا ہے۔
بھارتی بیان پر پاکستان نے عملی طور پر اقدامات کئے اور پاکستان کی فضائی حدود کو بھارتی طیاروں کے لئے بند کر دیا گیا۔ آج بھارت کے تمام اخبارات میں ہیڈ لائنز ہیں کہ پاکستان نے بھارت کے لئے اپنی فضائی حدود بند کر دی ہے۔
بھارت سے تجارت مکمل طور پر بند ہے۔ کسی تیسرے ملک کے ذریعے بھی بھارت سے تجارت نہیں ہو سکتی۔ بھارت کے لئے پاکستان کی فضائی حدود بند ہونے سے بھارت میں فضائی ٹکٹوں کی قیمتوں میں ہوشربا اضافہ ہوچکا ہے۔
بھارت میں متعدد فلائیٹس منسوخ یا تبدیل ہوئی ہیں اور کچھ لمبے روٹس سے چل رہی ہیں۔ بھارت کے فالس فلیگ آپریشن کے بعد افواج پاکستان مکمل طور پر پرعزم ہیں۔ پاکستان کسی بھی جارحیت کا مقابلہ کرنے کے لئے مکمل طور پر تیار ہے۔
نیشنل سیکورٹی کمیٹی نے واضح کیا ہے کہ پاکستان پرامن ملک ہے مگر کسی مس ایڈونچر کا بھرپور جواب دینا جانتا ہے۔ فالس فلیگ آپریشن کی شرمناک داستان سے بھارت کی عالمی سطح پر سبکی ہو رہی ہے۔
پاکستان کو بیانیہ کی جنگ میں سبقت حاصل ہے۔ پاکستانی ٹی وی چینلز، صحافیوں اور سوشل میڈیا صارفین کا مشکور ہوں کہ انہوں نے یک زبان ہو کر بھارتی ایجنڈے کو بے نقاب کیا۔ بھارت کے سینئر صحافی سوشل میڈیا پر رونا رو رہے ہیں کہ بھارت کا بیانیہ ناکام ہو چکا ہے۔
بھارتی میڈیا اور بھارتی صحافیوں نے فالس فلیگ آپریشن کے حوالے سے جھوٹی خبریں پھیلائیں اور جب پاکستان نے جواب دیا تو اب انہیں چھپنے کی جگہ نہیں مل رہی۔ بھارتی بیانیہ پیچھے رہ گیا ہے، بھارت میں یہ رونا رویا جا رہا ہے کہ پاکستان نے ہمیں کہیں کا نہیں چھوڑا۔
بوکھلاہٹ میں بھارت نے ایک غلطی پر دوسری غلطی کی۔ پہلگام واقعہ کی ایف آئی آر عجلت میں درج کی گئی۔ ایف آئی آر میں لکھا ہے کہ ضلع اننت ناگ، پہلگام پولیس اسٹیشن، واقعہ دن ایک بجکر 50 منٹ پر شروع ہوا اور 2 بجکر 20 منٹ پر ختم ہوا اور ایف آئی آر 10 منٹ بعد 2 بجکر 30 منٹ پر درج کر دی گئی۔
عقل کے اندھوں کو بھی پتہ ہے کہ اس قسم کے واقعات کی تحقیقات ہوتی ہیں، موقع کا جائزہ لیا جاتا ہے اور قانونی لوازمات پورے کئے جاتے ہیں، شواہد دیکھے جاتے ہیں۔ یہ کیسا واقعہ ہے جس کی ایف آئی آر وقوعہ کے 10 منٹ بعد درج کر دی جائے۔
اس طرز کی ایف آئی آر مقامی پولیس اسٹیشنوں میں معمولی جھگڑوں پر درج کی جاتی ہیں۔ بھارت نے فالس فلیگ آپریشن کو بین الاقوامی سطح کا معاملہ بنانے کی کوشش کی۔ ایف آئی آر منظر عام پر آنے سے انڈیا کا پورا پروپیگنڈا بے نقاب ہو گیا ہے۔
انڈیا کا جھوٹ ایک بار پھر سامنے آ چکا ہے۔ پاکستان کو ایک مرتبہ پھر بیانیہ کی جنگ میں سبقت حاصل ہوئی ہے۔ بھارت بری طرح ایکسپوز ہو چکا ہے۔ بھارت نے عجلت میں قانون کو دیکھے بغیر یکطرفہ طور پر سندھ طاس معاہدہ معطل کرنے کا بیان دیا۔
پاکستان دو ٹوک کہہ چکا ہے کہ پانی پاکستان کی لائف لائن ہے۔ پاکستان اس مسئلہ پر بھرپور طریقے سے جواب دے گا۔ بھارت اب پریشان اور بوکھلاہٹ کا شکار ہے۔
بھارت نے بوکھلاہٹ میں اب جیلوں میں پاکستانی قیدیوں اور مقبوضہ کشمیر کے شہریوں کا ان کاؤنٹر کرنا شروع کر دیا ۔ بانڈی پورہ میں الطاف لالی اور اڑی سیکٹر میں محمد فاروق اور محمد دین کو شہید کیا گیا۔ بھارت فالس فلیگ آپریشن کی آڑ میں لوگوں کو گھروں سے اٹھا کر شہید کر رہا ہے۔
بھارت کا مکروہ چہرہ پوری دنیا کے سامنے آ چکا ہے۔ فالس انکاؤنٹر کرنے سے بھارت کی بوکھلاہٹ مزید سامنے آ چکی ہے۔ بھارت پہلے بھی ایسے کام کرتا رہا ہے۔ بھارت نے پہلے پلوامہ واقعہ کی آڑ میں مقبوضہ جموں و کشمیر کی خصوصی حیثیت ختم کرنے کی کوشش کی۔
اس مرتبہ انہوں نے سندھ طاس معاہدہ ختم کرنے کی کوشش کی جو بری طرح ناکام ہوئی۔ بھارت مت بھولے کہ پاکستان دہشت گردی کے خلاف جنگ میں فرنٹ لائن اسٹیٹ ہے۔ بھارت دہشت گردی کو ہتھیار کے طور پر استعمال کر کے مظلوم بننے کی کوشش کر رہا ہے۔
بھارت کے خلاف پاکستان میں دہشت گردی کے ناقابل تردید ثبوت موجود ہیں۔ پاکستان نے دہشت گردی کے خلاف 80 ہزار جانوں کی قربانیاں دی ہیں۔ ہم دہشت گردی کے خلاف منظم اور متحد ہیں۔ دہشت گردی کے خلاف پاکستان کی کامیابیوں سے بوکھلا کر بھارت نے فالس فلیگ آپریشن ۔
آپ کی بوکھلاہٹ اور گبھراہٹ سب کے سامنے آ چکی ہے۔ ان کی بوکھلاہٹ کا اندازہ لگائیں کہ آج مدھیا پردیش میں ان کی اپنی فضائیہ نے غلطی یا تکنیکی خرابی کی وجہ سے اپنی ہی آبادی کو نشانہ بنایا۔
ان کی اہلیت کا اندازہ اس سے لگایا جا سکتا ہے کہ یہ اتنے اہل ہیں کہ اپنی ہی آبادی کو نشانہ بنا دیا۔ بھارتی فورسز کی پیشہ ورانہ امور زبوں حالی کا شکار ہیں۔ بھارت اپنے اس پائلٹ کو نہ بھولے جسے پاکستان میں چائے کا کپ پلا کر واپس بھیجا گیا تھا۔
بھارت کے مذموم مقاصد بری طرح ناکام ہو چکے ہیں، ان کا مکروہ چہرہ پوری دنیا کے سامنے آ چکا ۔ بیانیہ کی جنگ میں پاکستان کو سبقت حاصل ہے۔ پاکستان ہر شعبے میں سبقت کی صلاحیت رکھتا ہے۔
پاکستان کی قوم متحد ہے۔ آپ کے شہری تو آپ پر الزامات لگا رہے ہیں۔ پاکستان پوری طرح متحد اور یک زبان کھڑا ہے۔
بھارت کے مذموم مقاصد کو پوری طرح ایکسپوز کر رہے ہیں اور کرتے رہیں گے۔
مزید پڑھیں :مودی پہلگام فالس فلیگ آپریشن بے نقاب کرنے پر آسام کے رکن اسمبلی امین الاسلام کو گرفتار کر لیا گیا