اہم خبریں

ملتان، گیس دھماکہ ،20 مکان مکمل تباہ، 6 افراد جاں بحق، 31 زخمی،13 کی حالت تشویشناک

ملتان(اے بی این نیوز) انڈسٹریل اسٹیٹ میں گیس باؤزر میں دھماکا، 6 افراد جاں بحق، 31 زخمی ہوگئے، سی پی او ملتان صادق علی کاکہنا ہے کہ گیس باؤزر دھماکے سے کئی مکانات تباہ اور جانور جھلس کر ہلاک ہوگئے۔صاد ق علی نے بتایا کہ ایل پی جی باؤزر سے گیس کا اخراج جاری ہے، علاقےکو خالی کرالیا گیا ،

سی پی او ملتان کا کہنا تھا کہ 13 زخمیوں کی حالت تشویشناک ہے۔پولیس کا کہناہے کہ جاں بحق ہونے والوں میں ایک بچی سمیت 3 خواتین اور 2 مرد شامل ہیں، دھماکےکی جگہ سے ملحقہ مکان سے بھی ایک لاش برآمد ہوئی،دھماکے سے قریبی آبادیوں کے 20گھر مکمل طور پر ملبے کا ڈھیر بن گئے جبکہ دھماکے سے جزوی طور پر 70 گھر متاثر ہوئے ہیں۔

دوسری جانب ڈسٹرکٹ ایمرجنسی آفیسر کا کہنا ہے کہ نشتر اسپتال میں ایمرجنسی نافذ کردی گئی ہے اور ملحقہ آبادیوں میں سرچ آپریشن جاری ہے ۔ڈسٹرکٹ ایمرجنسی آفیسر کے مطابق جائے حادثہ اور اطراف میں بجلی اور گیس کی فراہمی بند کر دی گئی جبکہ ملتان مظفرگڑھ روڈ کو اب ٹریفک کیلئے کھول دیا گیا ہے۔
ملتان: گیس سے بھرا ٹینکر آگ لگنے سے پھٹ گیا، 5 افراد جاں بحق، 25 شدید زخمی

متعلقہ خبریں