اسلام آباد ( اے بی این نیوز ) پاکستان اور چین نےا دوطرفہ تعاون کو فروغ دینے پر اتفاق کر لیا. پاکستان کے وزیر اعظم شہباز شریف اور چینی وزیر اعظم لی کیانگ کے درمیان اسلام آباد کے وزیر اعظم ہاؤس میں وفود کی سطح پر ملاقات ہوئی۔ اس ملاقات میں دونوں رہنماؤں نے دوطرفہ تعلقات، علاقائی اور عالمی امور پر تفصیلی تبادلہ خیال کیا۔
پاک چین شراکت داری مضبوط ہو رہی ہے
ملاقات کے دوران دونوں رہنماؤں نے پاک چین سٹریٹجک تعاون پر مبنی شراکت داری کو سراہا، جو باہمی اعتماد اور مشترکہ اصولوں پر مبنی ہے۔ دونوں نے اس بات پر اطمینان کا اظہار کیا کہ یہ شراکت داری وقت کے ساتھ مزید مضبوط ہو رہی ہے۔
سی پیک فیز 2 پر عزم کا اظہار
دونوں رہنماؤں نے چین پاکستان اقتصادی راہداری (CPEC) فیز 2 کی اعلیٰ معیار کی ترقی کے لیے اپنے عزم کا اظہار کیا۔ انہوں نے اس بات پر بھی زور دیا کہ تمام جاری منصوبوں کو بروقت مکمل کیا جائے تاکہ پاکستان کی سماجی و اقتصادی ترقی کو فروغ مل سکے، خاص طور پر صنعت، زراعت کی جدید کاری، اور سائنس و ٹیکنالوجی کے شعبوں میں۔
چینی شہریوں کے تحفظ کی یقین دہانی
وزیر اعظم شہباز شریف نے پاکستان میں چینی شہریوں اور منصوبوں کے تحفظ کو یقینی بنانے کے لیے پاکستان کے غیر متزلزل عزم کا اعادہ کیا۔ دونوں فریقین نے اعلیٰ سطحی رابطے جاری رکھنے اور دوطرفہ تعاون کو مزید مضبوط بنانے پر اتفاق کیا۔
چینی سرمایہ کاری اور صنعت کی منتقلی
ملاقات میں پاکستان میں چینی سرمایہ کاری بڑھانے اور چینی صنعت کی منتقلی کے حوالے سے حکمت عملی پر بھی غور کیا گیا۔ دونوں رہنماؤں نے باہمی فائدے کے لیے تمام اہم شعبوں میں تعاون کو فروغ دینے کا عزم کیا۔
علاقائی اور عالمی امور پر قریبی مشاورت
دونوں ممالک نے اس بات کا اعادہ کیا کہ وہ علاقائی اور عالمی اہمیت کے امور پر قریبی مشاورت جاری رکھیں گے اور کثیرالجہتی فورمز پر تعاون کو مزید مضبوط کریں گے۔
مزید پڑھیں :پارٹی کا فیصلہ ہے اور احتجاج ہوگا،ڈی چوک ضرور آئیں گے، بیرسٹر گوہر
