نیویارک (اے بی این نیوز)امریکی کم لاگت ایئرلائن، اسپرٹ ایئرلائنز، ممکنہ طور پر اپنی پروازیں بند کرنے کی تیاری کر رہی ہے، جس سے ہزاروں ملازمتیں ختم ہونے کا خدشہ پیدا ہو گیا ہے۔

رائٹرز کے مطابق کمپنی ہفتہ کی صبح تقریباً 3 بجے آپریشنز معطل کر سکتی ہے، جبکہ بورڈ اجلاس کسی بھی ریسکیو منصوبے پر اتفاق کے بغیر ختم ہو گیا۔ یہ گزشتہ دو دہائیوں میں پہلی بار ہوگا کہ اس حجم کی کوئی امریکی ایئرلائن مکمل طور پر بند ہو رہی ہے۔

حکام کا کہنا ہے کہ ایران جنگ کے باعث جیٹ فیول کی قیمتوں میں دوگنا اضافہ کمپنی کے لیے بڑا دھچکا ثابت ہوا، جس نے اس کے مالیاتی منصوبے کو شدید متاثر کیا۔

اس صورتحال کو ڈونلڈ ٹرمپ کے لیے بھی ایک دھچکا قرار دیا جا رہا ہے، جنہوں نے 50 کروڑ ڈالر کے بیل آؤٹ کی تجویز دی تھی۔

امریکی حکومت نے دیگر ایئرلائنز سے بھی رابطہ کیا ہے تاکہ اسپرٹ کے مسافروں کو سہولت فراہم کی جا سکے۔ اس سلسلے میں United Airlines، American Airlines، Frontier Airlines اور JetBlue نے تعاون کی تیاری ظاہر کی ہے۔ادھر سارہ نیلسن نے خبردار کیا ہے کہ ایئرلائن کی بندش سے تقریباً 20 ہزار ملازمتیں متاثر ہو سکتی ہیں۔

کمپنی اب اپنے آپریشنز کو مرحلہ وار بند کرنے، طیاروں کی واپسی اور عملے کو گھر بھیجنے کا منصوبہ بنا رہی ہے۔ ماہرین کے مطابق اسپرٹ ایئرلائنز کی بندش نہ صرف امریکی فضائی صنعت بلکہ کم کرایوں کی مارکیٹ کے لیے بھی بڑا دھچکا ہوگی، کیونکہ یہ ایئرلائن مسابقت کے ذریعے ٹکٹ کی قیمتیں کم رکھنے میں اہم کردار ادا کرتی تھی۔
مزید پڑھیں: عالمی منڈی میں تیل کی قیمتوں میں 2 سے 3 فیصد تک کمی